Limbang ditukuka nyadi ‘ASF Control Area’ ba Sarawak
Mensia mayuh enda tau mai tama enggau pansut produk babi, dagin babi tauka dagin babi idup ke Limbang enti nadai pemendar DVS
“
Sehari tu (kemari), Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua udah nyain penetap iya nya Bagi Menua Limbang nyadi African
” Swine Fever (ASF) Control Area.
Dr Adrian Susin Ambud
Direktor DVS
KUCHING: Bagi Menua Limbang ditetapka nyadi African Swine Fever (ASF) Control Area ba Sarawak.
Direktor Opis Servis Veterinar Sarawak (DVS) Dr Adrian Susin Ambud madahka, tu berindik ati Bagi Menua Limbang semak enggau Sabah ti bisi ngeripotka kes ASF.
“Sehari tu (kemari), Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua udah nyain penetap iya nya Bagi Menua Limbang nyadi African Swine Fever (ASF) Control Area.
“Atur tu dipejalaika ari baruh Seksyen 35(1)(b) The Veterinary Public Health Ordinan 1999,” ku iya nengah sebengkah penerang, kemari.
Berindik ari pekara nya ku Dr Adrian, orang mayuh ba Bagi Menua Limbang nyengkaum sida ke nupi babi (pig farmer) dilalau ngambika enda mai tama enggau pansut produk babi, dagin babi tauka dagin babi idup ke Bagi Menua Limbang enti nadai pemendar DVS.
Nambahka nya mega dilalau ngambika enda mai tauka meli ngana chara online tauka nganjung sebarang produk dagin babi tauka dagin babi ke dalam enggau luar ari Bagi menua Limbang.
“Dalam timpuh ti sama kami mega ngelalau sida ke nupi babi (pig farmer) ngambika ngeripot enti bisi babi mati ngenyit enggau aktiviti ngelanggar undangundang bekaul enggau babi enggau produk dagin babi ngagaiOpis Veterinar Bagi Menua ke semak.
“Sida ke nupi babi mega dilalau ngambika suah agi meresi kandang babi enggau kandang ngelingi ngena pemunuh igi penyakit. Nambah nya enda tau enda meresi diri pengudah megai babi tauka produk babi,” ku iya.
Kena nyeliahka ari seberang pekara ti enda dikeinginka, ku iya, anang negu babi kampung tauka jelu tupi nengah chara nambahka penyauh fizikal.
Iya mega ngelalau ngambika enda ngelawa kandang babi enggau nagang orang datai ngagai kandang babi.
Kelimpah ari nya, semuan perengka pengangkut ari luar Sarawak patut madah enda ngira nama jelu enggau produk jelu ke dibai ngagai pemesai ba pintu penama ngagai Sarawak nyengkaum ba padang bilun enggau penama ari tasik.
Enda ngira produk dagin babi tauka dagin babi ti dibai sereta deka dijual tauka dijual ngena chara ngelaban atur tu, deka dirampas tauka dipunaska raban penerit adat Veterinar nengeri.
“Ari baruh seksyen tu, nadai pampas deka dibayar ngagai enda ngira bagi babi tauka produk babi ke udah dirampas.
“Enti enda ulih nitihka atur ti ditetapka deka diukum enda lebih ari RM1,000,” ku iya.
Berebak enggau tu Dr Adrian ngingat orang ke nupi babi ba bagi menua bukai ngambika bejaga sereta neritka agi pengelikun enggau enda ngemendarka orang datai ngagai kandang babi kelimpah ari patut ngeripot ngagai Opis Veterinar Bagi Menau ke semak nyema babi bisi mati ngenyit.