Utusan Borneo (Sarawak)

Kluster Buloh nyadi kluster baru ditukuka JPBNS kemari

-

KUCHING: Bisi siti agi kluster baru dirikodka di Sarawak kemari iya nya Kluster Buloh, Selangau ti bekaul enggau tiga buah rumah panjai.

Sekretaria­t Komiti Mutarka Penusah Ngenyit Nengeri Sarawak (JPBNS) nengah penerang berita madahka kluster baru aktif nya bekaul enggau kluster komuniti.

“Opis Pengerai Nengeri Sarawak udah netapka siti kluster baru iya nya Kluster Buloh ba Pelilih Menua Selangau, Sibu.

“Kluster Buloh ti bekaul enggau Pelilih Menua Selangau, iya nya kluster komuniti ti mungkur tiga rumah panjai ba kandang menua Sungai Buloh ba Pelilih Menua Selangau,” ku JPBNS.

Indeks kes kluster tu siku indu beumur 32 taun peranak menua (Sarawak) ti ditemu nengah pengawa meresa bisi tanda kena 21 Februari 2021.

Kes bisi tanda kenyau 17 Februari 202, ku JPBNS.

“Tu berampit nengah pengawa begulai semak peranak rumah panjai ti bekaul nya.

“Asil ari pengawa nyidi enggau meresa kontak semak kes tu, bisi nambah sepenyampa­u 27 kes baru ti ditemu.

“Bisi 68 individu udah diperesa iya nya 28 kes udah ditemu positif COVID-19 nyengkaum indeks kes; 36 individu negatif enggau empat individu agi nganti pemutus,” ku JPBNS.

Lalu semua 28 kes ari kluster tu udah dipasukka ba Sepital Sibu enggau PKRC ba Sibu ngambika diserara enggau diperubat.

Enggau penambah siti kluster baru nya, ngujungka penyampau kluster aktif COVID-19 Sarawak nambah nyadi 27 kluster.

Newspapers in Malay

Newspapers from Malaysia