Betong, Kanowit ba status Zon Mirah COVID-19

KUCHING: Pelilih Menua Betong enggau Kanowit ba status Mirah COVID-19 berengkah kemari.

Nitih ku penerang Sekretariat Komiti Mutarka Penusah Ngenyit Nengeri Sarawak (JPBNS), nya berindik ari penambah kes positif ba dua pelilih menua tu.

“Sehari tu, Pelilih Menua Betong enggau Kanowit udah betukar ngagai status Mirah pengudah ngerikotka 46 (Betong) enggau 45 (Kanowit) kes berampit ba pelilih menua tu dalam timpuh 14 hari ke udah.

“Pelilih Menua Selangau mega udah betukar ngagai status Oren pengudah ngerikotka sepenyampau 40 kes berampit ba pelilih menua tu dalam timpuh 14 hari ke udah,” ku JPBNS kemari.

Enggau penambah dua pelilih menua betukar ngagai status Mirah, ngujungka penyampau semua pelilih menua ba status Mirah nambah nyadi 11 buah pelilih menua ti nyengkaum Meradong, Kuching, Samarahan, Julau, Subis, Kapit, Bintulu, Miri enggau Sibu kelimpah ari Kanowit enggau Betong. Lalu penyampau pelilih menua ba status Oren bisi lima buah iya nya Selangau, Bau, Bukit Mabong, Dalat enggau Sri Aman.

Nambahka nya diripotka Pelilih Menua Pusa enggau Song kemari udah betukar nyadi statu Kuning COVID19.

“Pelilih Menua Pusa udah betukar ngagai status Kuning penguda dua kes berampit baru ba pelilih menua tu tu.

“Dua kes ba Pelilih Menua Pusa iya nya asil ari pengawa meresa COVID-19 bekaul enggau individu bisi tanda ba palan pengerai ba Pelilih Menua Pusa.

“Pelilih Menua Song mega betukar ngagai status Kuning pengudah ngerikotka sepenyampau 17 kes berampit ba pelilih menua tu dalam timpuh 14 hari ke udah,” ku JPBNS.

Pelilih Menua Asajaya, Beluru, Sarikei, Lundu, Saratok, Sebauh, Tatau, Pakan, Serian enggau Belagaagi ba status Kuning enggau penyampau semua 60 kes berampit ba pelilih menua tu diripotka dalam timpuh 14 hari ke udah.

Bisi 12 pelilih menua bukai agi ba status Gadung iya nya Matu, Lawas, Daro, Simunjan, Lubok Antu, Telang Usan, Limbang, Tanjung Manis, Tebedu, Mukah, Kabong enggau Marudi.