Utusan Borneo (Sarawak)

Rumah Mekal Mundam rumah panjai keterubah disambung elekterik ari SEB

-

MIRI: Rumah Mekal Mundam ngerikodka sejarah laban udah nyadi rumah panjai ti keterubah disambung enggau bekal elekterik ari Sarawak Energy Berhad (SEB) ba Baram Hilir.

Kaban Kunsil Nengeri (ADUN) Marudi Datu Dr Penguang Manggil madah, Rumah Mekal iya nya besemak enggau Kuala Baram sebuah ari semilan buah rumah panjai ba Baram Hilir ti keterubah disambung enggau bekal elekterik.

“Ungkup rumah panjai ke bukai ditu, pengawa ‘survey’ enggau ‘setting out’ udah dipejalai.

“Tang diatu perintah benung mutarka isu ‘wayleave’ enggau raban di ladang. Ke alai aku dipadahka tu nyau deka tembu,” ku iya nengah penerang media ditu, kemari.

Projek meri bekal elekterik deka diteruska ba Rumah Budin (Asam Paya), Rumah Nawan (Ujong Daun), Rumah Asam, Rumah Frederick Belaja, Rumah George, Rumah Ngelingkon­g, Rumah Chabob enggau Rumah Ubie ba Sungai Baram.

Ku iya, SEB mega masang tiang elekterik enggau kabel ba kandang menua Ulu Tinjar, Ili Tinjar, Sungai Peking, Sebatu enggau Sebubu.

Penguang ke mega Menteri Muda Kandang Menua nambah, renggat kedua projek tu mekuh ngagai kandang menua Baram Hilir, lalu renggat keterubah ba kandang menua Tinjar.

Ku iya, perintah mega benung bejalaika projek Skim Bekal Elekterik Alternatif Menua Pesisir Sarawak (SARES) khas ungkup 54 ruang bilik ba Kampung Benawa nyengkaum sida Mohammad Mansor sebilik.

Ku iya nyemetak, endang udah nyadi juluk iya deka meda semua peranak rumah panjai di kandang menua Marudi bisi bekal elekterik enggau ai datai ba taun 2025.

“Nyadi pengari rayat, aku endang chuku gaga ati laban mujur bejalaika projek tu. Pengelelak lebih empat taun nyadi pengari rayat udah ngemansutk­a asil lalu ba aku tu endang basa ti besai laban ulih mantu.

“Berengkah ari diatu, rayat di Marudi deka ngasaika mayuh pemansang berindik ari mayuh projek udah dikemendar perintah Gabungan Parti Sarawak (GPS) diatu benung dipejalai enggau deka dipejalai,” ku penguang.

Projek tu iya nya nyengkaum pengawa ngaga Jalai Simpang Lapok-Long Tisam, Kompleks Lumba enggau Main Lapok, Jalai Miri-Marudi, Dewan Komuniti Lapok, opis administra­syen baru di Beluru enggau Lapok, projek jalai ke Ili Tinjar enggau Baram Ili, Ulu Teru sereta mayuh agi.

Ungkup kandang menua Beluru, pengawa ngaga substesyen baru ba Lapok enggau rentayan grid elekterik baru benung dipejalai kena nambah manah bekal elekterik ti suah dikeruga sebedau tu,” ku iya seraya kemaya tu Beluru nerima bekal elekterik ari substesyen Marudi.

K iya nyemetak, projek tu ukai kena ngulihka undi laban tu udah lama dikemendar­ka.

 ??  ?? SEJARAH: Staf SEB begambar begulai enggau kban Komiti Pemansang enggau Pengelikun Genturung Pendiau (JKKK) Rumah Mekal maya pengawa nyambung bekal elekterik ba rumah panja nya, bedau lama ti udah.
SEJARAH: Staf SEB begambar begulai enggau kban Komiti Pemansang enggau Pengelikun Genturung Pendiau (JKKK) Rumah Mekal maya pengawa nyambung bekal elekterik ba rumah panja nya, bedau lama ti udah.

Newspapers in Malay

Newspapers from Malaysia