JBALB terus komited meri servis ngagai rayat Sarawak
Dalam mekalka ai beresi nyengkaum di kandang menua pesisir ke nadai ngembuan akses jalai alun enggau paip besai
“Tu iya nya pengawa manah perintah Sarawak dalam mekalka ai beresi nyengkaum ba kandang menua ti jauh ” ari paip besai. Datuk Dr Abdul Rahman Junaidi Menteri Muda Bekal Ai
KUCHING: Opis Bekal Ai Kandang Menua Pesisir (JBALB) komited meri servis ti pemadu manah ngagai rayat tu dalam mekalka ai beresi nyengkaum di kandang menua ti jauh ke enda ngembuan akses jalai alun enggau paip besai, ku Menteri Muda Bekal Ai Datuk Dr Abdul Rahman Junaidi.
Iya madahka, nyema ungkup kandang menua ti jauh, JBALB bisi Program Bekal Ai Alternatif Sarawak (SAWAS) ke diatu ba renggat kedua projek.
Nitih ku iya, renggat keterubah SAWAS udah tembu abis kena taun 2018 lalu ngaul 22 genturung pendiau enggau
ungkus RM49.7 juta nengah lima pakej.
“Tu iya nya pengawa manah perintah Sarawak dalam mekalka ai beresi nyengkaum ba kandang menua ti jauh ari paip besai,” ku iya maya program meri licha pejalai projek SAWAS ba Indu Opis JBALB ditu, bedau lama ti udah.
Dr Abdul Rahman ke mega Menteri Muda Pekara Islam enggau Dewan Bandaraya Kuching Utara(DBKU) madah, bisi 53 genturung pendiau agi deka ngaul diri enggau renggat kedua progam SAWAS.
“Renggat kedua tu ngaul 22 pakej enggau unkus RM134.6 juta lalu projek tu ngaul tiga kandang menua iya nya selatan, tengah enggau utara,” ku iya.
Dalam Lumpar Pemansang Malaysia Ke-12 (RMK12), ku iya, bisi 997 genturung pendiau deka nyereta program SAWAS enggau 21,777 peranak ti deka nerima pemaik.
“Ungkus kena bejalaika projek dalam RMK12 nyangka deka ngena urung RM3 bilion,” ku iya.
Dr Abdul Rahman madah, program SAWAS dikemansang ngena pun pemisi pengeraja asal baka graviti, ai ujan enggau sungai.
Sama datai ba program tu iya nya Direktor JBALB Chang Kuat Shian.