Sesi besekula ditangguhka ba Zon Mirah ngelantangka ati apai indai
BINTULU: Gempung Gerempung Pengajar Sarawak (STU) Bagi Menua Bintulu madahka Komiti Mutarka Penusah Ngenyit Nengeri Sarawak (JPBNS) ti nangguhka pengawa muka sekula ba semilan pelilih menua ba selampur Sarawak ke agi dalam status Zon Mirah endang engkeman sereta ngurangka pengirau ati apai indai sentang pengelikun bala anak sida.
Chairman STU Bagi Menua Bintulu ti mega Sapit Presiden STU Zon Utara Soo Siew Huong madah, pemutus tu nyata udah ngenyamaika ati apai indai, nembiak sekula sereta bala pengajar.
“Taja semua nembiak enggau pengajar ngembuan juluk deka pulai ke sekula laban ti ransing ngemunka sesi ngajar enggau belajar betemu mua ketegal ti meri empas ke manah agi nengah
iring sereta embing ti terus ari pengajar, tang pengelikun semua mega patut dikemerat,” ku iya nengah penerang lebuh ti ditelefon Utusan Borneo.
Ku iya, STU Bagi Menua Bintulu mega beterima kasih enggau chara JPBNS ti mutarka enggau lengkas pengudah mansik buah runding enggau peminta raban apai indai sereta gerempung pengajar.
Bekaul enggau bekal vaksin COVID-19 enggau perintah Sarawak udah berengkah meri tuchuk vaksin PfizerBioNTech ke deka dikerembai ngagai semua peranak ti patut bulih, Soo madahka raban pengajar mega pengereja pengawa rintai mua ti dalam kategori raban ke bisi risiko tinggi ke patut dituchuk vaksin sebedau sida berengkah bejalaika tanggungpengawa di sekula.
“Kitai chukup lantang ati laban Menteri Kanan Pelajar Senator Datuk Dr Radzi Jidin udah madahka Opis Menteri Pelajar Malaysia (KPM) udah minta ngagai Opis
Menteri Pengerai Malaysia (KKM) ngambika meri pemerat ngagai pengajar dulu ti diberi vaksin ungkup renggat keterubah,” ku iya.
Ku iya madah, nadai sapa ke nemu kemaya COVID19 deka badu lalu pemutus nutup sekula ukai chara mutarka nya timpuh panjai, tang semua rayat patut seruran ngasika Prosedur Operasyen Standard (SOP) ba sebarang alai sida diau kena nyaga pengelikun enggau pengerai semua.
Malam kilah ensana, JPBNS udah madahka nengah penerang media iya nya sesi besekula ba semilan pelilih menua di Sarawak (ke agi dalam sttus Zon Mirah) ditangguhka pengelama dua minggu ti berengkah diteritka 1 nyentuk 14 Mac ti ngaul Kuching, Samarahan, Julau, Meradong, Sibu, Kapit, Bintulu, Subis dan Miri.