Pemutus Larry badu nyadi chairman enda ngeruga tanggungpengawa PKR Sarawak
KUCHING: Parti Keadilan Rakyat (PKR) Sarawak enda tekeruga enggau pemutus Larry Sng ti badu nyadi Chairman PKR nengeri.
Ketuai PKR Pampang Mengeri Kuching Dominuque Ng madah, ari iya empu endang asa ati enggau pemutus Kaban Parlimen Julau nya.
“Pemutus Larry badu nyadi chairman udah ditukuka parti. Kebuah iya badu, aku ngasaika nya patut nanya Larry ,” ku iya.
“Tang ba aku empu, pemutus Larry tu endang ngasaka ati aku enggau mega raban parti semua,” ku iya.
Iya madah munyi nya lebuh ti ditemu ba Kampung Sinar Budi Baru, Batu Kawa ditu, kemari.
Dulu agi ari nya, Ng udah datai nyuaka bantu iya nya tilam, panggal enggau pemakai ninting hari ngagai sida ti tasah dituntung penusah ampuh bah ba genturung pendiau tu.
Ng beserimbai enggau tu pechaya PKR Sarawak enda tekeruga enggau pemutus ngemaduka diri Larry lalu ulih napi nama ti nyadi tu.
“Baka jaku Sekretari PKR Nengeri (Joshua Jabeng), ketuai datai enggau mupuk. Tang pengawa kitai agi komited ngagai rayat,” ku iya.
Bekaul enggau agih bantu nya, tu ku iya disuaka ngagai semua peranak ti tekeruga ba genturung pendiau tu ti enda ngira jalai pengarap, bansa tauka penemu politik.
Taja PKR ku iya enda bepekit minta pilih ba Batu Kawa, tang bantu tetap diberika ngagai peranak ti begunaka nya.
“Kampung Sinar Budi Baru tu udah tiga kali dituntung penusah ampuh bah tunggal. Kitai beterima kasih ngagai orang ti meri bantu pengasih dalam ngagaihka bantu tu,” ku iya.
Beserimbai enggau tu, Ketuai Orang Indu PKR Pampang Mengeri Kuching Cherise Ng madahka bisi 150 ruang bilik ari genturung pendiau tu udah nerima bantu.
Naka ke diatu, ku iya, lebih ari 3,000 ruang bilik ba selampur Sarawak udah dibantu PKR Sarawak seraya ti nyangkal dawa PKR enda ngaga sebarang aksyen mantu rayat.