Pemindah entara zon enda dikemendar dalam timpuh PKPB

KUCHING: Pemindah entara zon enda dikemendar semanjai timpuh Atur Nagang Pemindah Bisi Penetap (PKPB) ti dilanjar di nengeri tu berengkah 2 nyentuk 15 Mac 2021.

Pemindah entara zon ti enda dikemendar tu iya nya dalam Prosedur Operasyen Standard ti pemadu baru kedikeluarka Komiti Mutarka Penusah Ngenyit Nengeri Sarawak (JPBNS).

Taja pia, ku iya, ungkup servis ti patut begunaka sida minta pemendar ngambika ulih mindah entara zon enggau permit polis.

Ungkup pemindah peranak mega iya nya dikemendar dalam zon sida empu kelimpah ari ke kandang endur ti kena pentin Atur Nagang Pemindah Diteritka (PKPD).

“Penyampau orang ti dalam perengka pengangkut diri empu iya nya nitihka kapasiti perengka pengangkut. Tang individu ti bisi risiko tinggi enggau nembiak mit enda diperansang keluar ke palan mensia mayuh, tebuka enggau dedat.

“Pia mega penyampau orang ti dikemendar dalam perengka pengankut mai barang enggau servis sereta rentayan ekonomi/industri bepanggai ngagai lisin pengerejista perengka pengangkut dagang,” ku iya.

Ku iya nambah, ungkup pemindah perengka pengangkut diri empu, Opis Perintah tauka kompeni peribit dalam tuju mansang enggau pulai ari palan kereja tauka bejalaika pengawa rasmi perintah iya nya bepanggai ngagai kapasiti penuduk dalam perengka pengangkut nya empu.

Pia mega aktiviti enggau servis ba semua padang bilun enggau palan penyangkai kapal udah dikemendar bejalaika operasyen.

“Ungkup servis mensia mayuh baka servis bas, feri, bilun, teksi/e-hailing enggau ke bukai perengka pengangkut mensia mayuh dikemendar bejalaika operasyen (maya operasyen iya nya nitihka penetap) lalu bepelasarka kapasiti perengka pengangkut.

“Servis nganjung pemakai mega dikemendar bejalaika operasyen ari puku 6:00 pagi nyentuk 10:00 malam semanjai timpuh PKPB dilanjar,” ku iya.