Pasar Sentral Sibu berengkah dibuka kena 1 Mac
SIBU: Pasar Sentral Sibu ba Jalai Channel ti udah ditutup kenyau ari 8 Februari nyin tadi deka dibuka berengkah 1 Mac (Hari Satu), ku Kunsilor Opis Kaunsil Mengeri Sibu (SMC) Albert Tiang.
Pasar ti pemadu besai di Sarawak tu udah ditutup ari 8 nyentuk 14 Februari lalu dibuka baru kena 15 Februari, tang timpuh nutup nya dilanjarka ngagai 19 Februari berindik ari penyampau kes positif COVID-19 ti majak nambah ke ngaul pasar tu.
Taja pia, timpuh nutup Pasar Sentral Sibu sekali agi dilanjarka semilan hari ari 20 nyentukka 28 Februari.
Pasar tu ti nyual mayuh macham bansa barang udah endur 1,100 pedagang.
Tiang ke mega chairman Komiti Mendam Pedagang enggau Pedaja Mit SMC maya ti ditelefon kemari madahka, bala pedagang agi nitihka gintir timpuh bedagang ninting hari.
“Operasyen dagang sida ti nitihka gintir, selalu nya urung 500 iku pedagang deka bejalaika operasyen tang mayuh ti ngambi kemisi, nya alai aku ngira urung 400,” ku iya.