Sesi Parlimen pelasar berandauka empas pandemik COVID-19
Ukai patut alai berandauka isu politik laban nya semina deka masau jam enggau duit rayat, ku Nanta Linggi
“Politik tau dikenudika. Enti ulih, anti mih maya pengawa bepilih ke deka datai, (diatu) rayat tau milih gempung ke patut nyadi perintah udah nya ila.
Dato Sri Alexander Nanta Linggi ”
Sekretari Besai Gabungan Parti Sarawak (GPS)
KUCHING: Sesi Parlimen maya timpuh emergensi patut nyadi pelasar alai berandauka pekara bekaul empas pandemik COVID19.
Sekretari Besai Gabungan Parti Sarawak (GPS) Dato Sri Alexander Nanta Linggi madahka sesi Parlimen nya ukai patut alai berandauka isu politik laban nya semina deka masau jam enggau duit rayat.
“Politik tau dikenudika. Enti ulih, anti mih maya pengawa bepilih ke deka datai, (diatu) rayat tau milih gempung ke patut nyadi perintah udah nya ila.
“Pengawa bepilih deka diatur lalu nya mih maya kitai nyerahka ngagai rayat ngambi nentuka bagi perintah ti dikedeka ke sida.
“Nya alai tepulai ngagai parlimen nentu sekalika deka baum baru tauka enda. Manah tauka enda, kitai patut meda pematut kebuah parlimen baum baru,” ku iya kemari lebuh ngenang jaku ari Yang Di-Pertuan Agong bedau lama udah, ti ngemendarka Parlimen tau baum sekumbang maya emergensi tu.
Nanta ke mega Menteri Dagang Dalam Negeri enggau Pekara Penguna madah, parlimen tau baum baru sereta barandauka pekara ke berat.
“Taja pia sesi parlimen sekumbang maya emergensi tu enda patut nyadi ke pelasar ngagai barang bagi raban tauka parti politik mantaika pekara politik sida,ningkilka Perikatan Nasional (PN), numbangka perintah semina ketegal bepolitik sereta nguji nyadi menteri besai nyilih menteri ke diatu.
“Aram mih kitai ngasika jaku tangkan Yang Di-Pertuan Agong, iya berundingka chara kena ngelaban pandemik COVID-19 lalu mutarka penanggul ke bisi kelebih agi maya menua udah ngepunka program imunisasyen menua,” ku iya.
Ku Kaban Parlimen Kapit nya baru, fokus patut diberi ngagai pengawa mutarka penanggul enggau pemar ke ditapi rayat ketegal pandemik COVID-19.
Taja pia, Nanta bebasa sereta nerima prinsip nadai tatak mantaika penemu enggau demokratik.
“Aram mih kitai sama napi pemar ke ngenyit nyadi enggau ke nyelai diatu. Kelalu mayuh politik ngagai sesapa aja laban nya tau ngujungka kitai enda ulih fokus ngagai pengawa ngelaban Covid19 tauka nentuka Malaysia selamat ari penyakit tu,” ku iya.
Ku iya, sekeda ari pengawa ti dipejalaika kena napi pemar ti nyadi ketegal pandemik COVID-19, perintah udah nyendiaka bemacham insentif ngagai rayat enggau sektor dagang kena nentuka enda mayuh orang diketuka gawa lalu utai ke diguna ruang bilik sida mega semampai ulih disediaka.
Berebak enggau nya, iya mega ngelalau Sarawak, ke alai timpuh Kunsil Nengeri (DUN) deka abis timpuh kena bulan Jun taun tu, lalu pengawa bepilih mesti diatur pengudah nya.
“GPS udah sedia napi pengawa bepilih. Juluk ati aku, kitai ngenanka GPS ngambika mengkang relevan lalu ulih bejalaika tanggungpengawa majak ngemansangka Sarawak, nentuka pemansang enggau pengelantang rayat dijaga enggau manah, Pekara dikemataka rayat mega diintu. Ketegal nya mih GPS ditumbuhka.
“Kitai (GPS) mesti agi relevan ungkup nengeri enggau rayat. Tu ukai utai ke baru laban Kepala Menteri Abang Johari Tun Openg, kabinet iya, bala presiden parti komponen GPS enggau semua ketuai ba mayuh renggat meri jaku tangkan ke sama,” ku iya.