Larry Sng udah ngaga pemutus ke betul: Karim
KUCHING: Pemutus Kaban Parlimen Julau Larry Sng ninggalka Parti Keadilan Rakyat (PKR) Sarawak sereta madahka diri nyukung Menteri Tan Sri Muhyiddin Yassin, endang p emutus ke betul.
Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah madah, Larry siku orang politik ke ngembuan peneleba sereta udah nyadi pengari rayat kenyau ari taun 2001 lalu udah aktif dalam politik pengelama 20 taun.
“Iya (Larry) nemu sereta ulih ngasaika peneka rayat lalu nemu sapa ti dikedeka ke nyadi Menteri Besai enggau gempung politik ti pemadu manah ungkup Malaysia.
“Iya udah ngaga pilih ke betul laban nyukung Tan Sri Muhyiddin Yassin enggau perintah Perikatan Nasional (PN),” ku iya lebuh dirandau Utusan Borneo kemari.
Abdul Karim ke mega Menteri Dagang Temuai, Seni enggau Main Asal madah munyi lebih dipinta ngenang pemutus Larry ti ngelengka ke pangku pengawa nyadi Chairman PKR Sarawak, udah nya nyukung Tan Sri Muhyiddin.
Ditanya nyema Larry bisi ati nyemilik parti komponen Gabungan Parti Sarawak, Abdul Karim madahka iya enda ulih nyaut tanya nya laban pemutus nya bepanggai ba kaunsil besai GPS ti diarika bala presiden.
“Aku enda ulih nyaut tanya tu laban kapasiti aku enda datai dia,” ku iya
Dulu ari nya, Larry kena Hari Minggu nyin tadi madahka pemutus ningkilka diri ari PKR digaga iya pengudah berandau enggau bala pengundi ba sitak iya.
“Kami udah sama ngaga pemutus lalu aku madahka diri ngelengkaka pangku pengawa aku ari PKR berengkah ari tekala nya.
“Kelalu mayuh renyang politik ti nyadi setaun ke udah lalu tu udah ngerusak ekonomi negara enggau pengelantang rayat.
“Aku pechaya chara ke padu manah kena nyingkang ke mua iya nya nyeliahka politik ba maya ke diatu,ngambika kitai sama ulih nyaup ngenegap enggau negika baru menua ti dikesayau,” ku iya. Ex- Chairman PKR Sarawak nya madah, Menteri benung ngaga pengawa ke patut kena mantu rayat Malaysia ba maya ke amr tu, lalu iya pechaya iya mega patut nyukung Menteri Besai.
“Aku menang ba pengawa bepilih dalam taun 2018 lalu nyadi siku orang ti ngatika diri, aku madahka diri nyadi Kaban Parlimen Ngatika Diri ti bebakih enggau perintah,” ku iya.
Larry nyemilik PKR pengudah menang ba kerusi Parlimen Julau maya Pengawa Bepilih Besai ke-14 lalu taun nyin tadi, iya dichiri nyadi Chairman PKR Sarawak pengudah Baru Bian ningkilka diri ari parti nya.
Dulu ari nya, Larry enggau Kaban Parlimen Tebrau Steven Choong Shiau Yoon udah nyuaka ‘Akuan Bersumpah’ ngagai Menteri Besai Tan Sri Muhyiddin Yassin seraya madahka diri nyukung perintah PN.
“Sehari tu aku nerima ‘Akuan Bersumpah’ (SD) ari dua iku Kaban Parlimen penyakal ti madahka diri nyukung perintah PN.
“Akuan Bersumpah nya ari Kaban Parlimen Julau, YB Larry Sng Wei Shien enggau Kaban Parlimen Tebrau, YB Steven Choong Shiau Yoon ti disain lalu disuaka seduai ngagai aku pengudah sesi gempuru raban Menteri beserimbai setaun perintah PN di Putrajaya,” ku Muhyiddin.