Bomba Sarawak udah nyikap diri napi musim kemarau
KUCHING: Opis Bomba enggau Penyelamat Malaysia (JBPM) Sarawak udah sedia napii sebarang insiden kampung angus maya musim kemarau tu.
Direktor JBPM Sarawak Khirudin Drahman@Hussaini madah, menara alai ninjau udah dibuka lalu pengawa nagang tama ngagai kampung ti mudah angus mega diteritka.
Ku iya, kandang menua di utara Sarawak baka Bintulu, Miri, Limbang enggau Lawas mega diberi pearati ari sukut matau enggau rninjau ari langit ti dipejalaika beberapa ejensi ke megai tanggungpengawa nya sereta deka seruran dikemataska.
“Ubah Monsun Timur Laut ujung Februari enggau pengemun musim panas bulan Mac nyentuk pun bulan Mei deka ngasuh hari angat enggau dipuputka angin ari tasik maya siang hari, lalu gaya hari ke rangkai tu tau ngasuh babas ke rangkai mudah angus,”.
“Taja pia pekara tu mesti dikemata opis Pihak Bekuasa Kandang Menua, kompeni ladang ke besai enggau individu ti berengkah betanam,” ku iya nengah sebengkah penerang kemari.
Ku iya nyemetak, ari pansik enggau analisa ti digaga ba ujung taun 2020, tetemuka kes penyadi kampung tauka babas angus endang ketegal mensia empu.
“Taun siti nyin nyin tadi maya Atur Nagang Pemindah (PKP), PKPD, PKPB enggau PKPP dipejalaika, kes babas enggau kampung mit ke angus nadai nyadi,” katanya.
Berebak enggau nya, iya madahka JBPM Sarawak deka bejalaika pangawa matau ngagai palan ti ‘angat’, seraya meri jaku tangkan ngagai orang ke bekebun enggau peladang nyengkaum koordinasyen begulai enggau sekeda ejensi baka Opis Rampa Menua sereta Kaunsil Pengeraja Asal enggau Rampa Menua Sarawak.
Kelimpah ari nya ku Khirudin, pengawa matau nengah media sosial sereta jampat meri timbal nyema bisi nyadi penusah angus ba babas tauka kampung.
“Ngena peluang tu, aku minta komuniti sama bejalaika tanggungpengawa positif kena nyeliahka pengawa nunu palan alai bekebun nyengkaum ti disengajaka.
“Nyema bisi ati deka nunu, anang enda nitihka atur baka ungkup individu enggau orang bekebun kecil mit, anang nunu reban ke besai lalu patut bejejaga baka ngaga parit entara tauka nyendiaka kereban kena ngerara api sereta tangkan enggau pemendar ari ejensi ti megai pengawa nya,” ku iya.