Lima lelaki ditangkap ketegal ngelalaika insap enggau ai bisa ti nadai dichukai
KUCHING: Lima lelaki ditangkap enggau 1,500 karton insap burak enggau 1,700 karton ai bisa bemacham bansa dalam ‘Op Libas’ ti dipejalaika ba Kampung Sudat, kena Hari Minggu nyin tadi.
Komander Briged Sarawak Pasukan Gerakan Am (PGA) SAC Mancha Ata madah, kelelima suspek beumur entara 20 nyentuk 40 taun, ditangkap urung pukul 7.45 pagi ba palan nya.
“Bejalaika pengawa berindik ari pemadah enggau pansik, raban nya udah meresa kandang endur nya sereta tepedaka gaya ti baka bisi ngelalaika utai.
“Pengudah diperesa, semua lima suspek ngaku semina pekereja lalu pengudah diperesa silik, semua suspek enda tebantaika dokumen sah ngempu barang nya baka insap ti dibai tama nadai pemendar enggau ai bisa ke dipelaba nadai kena chukai,” ku iya nengah sebengkah penerang kemari.
Ku iya, antara barang ke dirampas iya nya insap burak 1,500 karton (300,000 batang) dianggarka beungkus RM 225,000 enggau ai bisa bemacham bansa ti bisi 1,700 karton ti dianggarka beungkus RM 311,199.55.
Tambah Mancha, bela ditanka sebuah entukar MPV ti dianggarka berega RM90,000, dua buah lori ti sama dianggarka berega RM100,000 enggau RM 60,000.
“Semua penyampau nyengkaum chukai dianggarka RM 741,199.55,” ku iya.
Ku iya, semua suspek ditangkap ari baruh Seksyen 135(1)(d) Akta Kastam 1967.
“Barang ke dirampas enggau suspek ke ditangkap nya udah diserahka ngagai Indu Opis Polis Pelilih Padawan ngambika atur bukai nangkanka nya dipejalaika,” ku iya.