Anang ngaga pengawa nunu chara tebuka
Sida ti ditemu ngaga pengawa tu lalu ngujungka penusah angus ulih diukum nyentuk RM100,000 sereta jil lima taun
MIRI: Penyampau ukum nyentuk ke RM100,000 sereta jil lima taun ari baruh Undang-Undang Ordinan Pengeraja Asal enggau Rampa Menua deka diberi ngagai sida ti ditemu salah ngaga pengawa nunu tebuka.
Menteri ti Megai Tanggungpengawa Komiti Mutarka Penusah Ngenyit Bagi Menua (JPBB) Miri Datuk Lee Kim Shin ngelalau ngagai rayat ngmbika enda ngaga pengawa nunu tebuka tauka sida deka betapi enggau ukum ti berat.
“Aku dipadahka Pemesai Rampa Menua Opis Pengeraja Asal enggau Rampa Menua (NREB) Miri Joseph Uyo ti madahka undangundang tu udah diubah lalu dikemendar dipejalaika berengkah taun tu.
“Nya alai aku minta semua ejensi ti sama matau kediri empu lalu meri jaku tangkan sereta notis ngagai bala pekebun mit, madahka sida bekaul enggau undang-undang kitai sentang pengawa nunu tebuka ti udah diteritka lalu bayar ukum pan udah niki,” ku iya madah ngagai pengarang berita pengudah ngelawa ngagai pos nyaga ba Kuala Baram ditu kilah ensana.
Beserimbai enggau tu, Lee ti mega Mentri Perengka Pengangkut Sarawak minta kerejasama semua raban terus ngasika undang-undang tu kena nyeliahka sida ditinggang ukum ari raban penerit adat.
“Kitai ukai semina rindu ati diri deka ngukum, kitai bejalaika aksyen laban enda tau enda ketegal sida ti ngelanggar atur.
“Pengawa sida ti nunu enggau tebuka tu udah ngujungka selampur rayat Miri napi penusah kelebih aagi sida ti bisi penanggul pengerai baka ampus,” ku iya.
Berindik ari nya, Lee minta sida ti bekebun bumai ba kandang menua ti suah diripot nyadi penusah angus ba taun sebedau tu ngambika enda ngaga pengawa nunu tebuka tu.
Sama bisi datai ba program ngelawa tu iya nya Pemangku Residen Bagi Menua Miri Abdul Aziz Yusuf enggau Ketuai Opis Bomba enggau Penyelamat Malaysia Zon 6 Miri Penguasa Kanan Bomba I Law Poh Kiong.
“
Aku dipadahka Pemesai Rampa Menua Opis Pengeraja Asal enggau Rampa Menua (NREB) Miri Joseph Uyo ti madahka undang-undang tu udah diubah lalu dikemendar dipejalaika berengkah taun tu.
Datuk Lee Kim Shin
Menteri Perengka Pengangkut Sarawak