Anang irau, kakang ati enggau vaksin COVID-19 Pfizer-BioNTech
KUCHING: Mensia mayuh enda ibuh irau ati tauka kakng ati enggau pengelikun tuchuk vaksin COVID-19 ti dikena ba menua kitai, pia ku Menteri Dagang Temuai, Seni enggau Main Asal Dato Sri Nancy Shukri.
Ku iya madah, perintah besai udah nentuka vaksin tu likun dikena lalu udah nengah mayuh macham pansik baka ti digaga ba menua luar.
“Perintah enda muntang temu ngena vaksin COVID19 ti dikerindu sida aja ngagai rayat.
“Pengawa milih vaksin ukai siti pekara ti mudah laban tu ngaul nyawa mensia. Berindik ari nya, vaksin ti diberi ngagai rayat tu udah nengah proses peresa ti terit lalu dipansik ari bemacham aspek,” ku iya.
Iya bejaku munyi nya lebuh ti ditemu pengarang berita lebuh ti nerima tuchuk vaksin bansa Pfizer-BioNTech ba Klinik Pengerai Sadong Jaya ditu, kemari.
Sama nerima tuchuk vaksin tu iya nya Kaban Kunsil Nengeri (ADUN) Sadong Jaya Ir. Aidel Lariwoo.
Nancy ke mega Kaban Parlimen Batang Sadong madah, pengawa ngambi vaksin ukai nya pekara baru laban mayuh agi vaksin kala diambi sebedau tu baka Bacillus Calmette-Guerin (BCG) enggau mayuh agi.
“Taja ari sukut pemanah guna nya bisi bida, tang enggau pengeransing perintah nengah vaksin COVID-19 ulih ngurangka pengelekai igi penyakit tu ba rayat,” ku iya.
Lebuh ti ditanya lapa milih deka betuchuk vaksin tu ba Sadong Jaya, ku Nancy madah, nya kena ngulihka pechaya bala rayat di sitak Parlimen Batang Sadong.
“Aku ngarap pengudah betuchuk vaksin tu deka nyadi lalau ungkup semua komuniti ngambika milih singkang ke sama,” ku iya.
Dulu agi ari nya, Nancy sebedau tu udah ngelimpangka awak dalam pengerai simbolik nyuaka Projek SIap Bina BAru Pusat
Dalam Komuniti (PDK) Sadong Jaya ti beungkus RM400,000 ari baruh agih belanja Program Transformasyen Menua Pesisir (RTP) Perintah Sarawak.
Iya mega bisi ngabas begunan baru Pusat Tahfiz Darul Iman ke udah tembu digaga bulan Ogos taun nyin kemari ti ulih endur urung 60 iku nembiak tahfiz ba kandang menua Sadong Jaya.
Iya mega udah nyuaka bantu laluh 448 tangki ao sitak Sadong Jaya ke ngaul 10 genturung pendiau di Sadong Jaya.