KGBS setuju pemutus mayuh sekula dikemendarka beoperasyen di nengeri tu
KUCHING: Gempung Gerempung Pengajar Bumiutera Sarawak (KGBS) setuju enggau pemutus ti ngemendar sereta nambahka penyampau sekula primari ba nengeri tu ngena chara ngemeran enggau ngemeratka prosedur operasyen standard (SOP) ti ditetapka kena nagang pengelekai pandemik COVID-19.
Presiden KGBS, Ahmad Malie madah KGBS arap bendar pemutus ke ditetapka nya udah tentu mungkur mayuh faktor pengelikun enggau pengerai.
Baka ti dipadah ngagai KGBS ku iya, bisi 231 buah sekula primari dikemendarka beoperasyen tauka ngajar enggau belajar betunga mua berengkah 8 Mac tu.
“Baka ti kala dipadah sebedau tu, KGBS seruran setuju enggau pekara dibantai ke bekaul enggau sesi sekula berengkah beoperasyen baka ti dipadah apin lama.
“KGBS arap bendar atur ngemendarka beoperasyen tu udah beratika semua pekara bekaul enggau faktor pengelikun enggau pengerai bepelasarka SOP ti udah ditetapka,” ku iya madah ngagai Utusan Borneo.
Pemendar ngagai 231 buah sekula primari beoperasyen iya nya nambahka pemayuh sekula ke endang udah beoperasyen sebedau tu iya nya 1 Mac tu tadi.
Lalu ku iya setipak bendar 8 Mac mega iya nya maya renggat kedua sesi ngajar enggau belajar betunga mua deka dipejalaika ungkup Primari 3 ngagai 6 baka ti dijadual Opis Menteri Pelajar Malaysia (KPM).
“Berindik ari penyampau nembiak datai ke sekula majak nambah, KGBS seruran ngingatka semua sekula ngambika seruran ngemeran sereta ngemeratka SOP ti udah ditetapka.
“KGBS minta ngambika pengajar enggau apai indai sereta penyaga seruran ngingatka nembak pasal SOP ti ditetapka awakka pengawa ngajar enggau belajar (PdP) ulih dipejalaika enggau nadai penanggul,” ku iya.
Ensanus, pengudah pengawa berunding entara Komiti Mutarka Penusah Ngenyit Nengeri Sarawak (JPBNS) begulai enggau Opis Pelajar Nengeri Sarawak (JPNS) ti ngarika KPM udah ngemutuska 1,045 buah sekula perintah/sekula bantu perintah serata nengeri Sarawak dikemendarka beoperasyen betunga mua berengkah 8 Mac 2021.
Nya mungkur penambah sepenyampau 231 buah sekula primari ba nengeri Sarawak ti dikemendarka beoperasyen betunga mua dibandingka enggau 814 buah sekula kena 1 Mac 2021.
Lalu 220 buah sekula primari ba kandang menua berisiko tinggi pengelekai COVID-19 bedau beoperasyen nyentuk 14 Mac 2021.