Kluster Bukit Tunggal kluster baru ditukuka di Sarawak
KUCHING: Sarawak ditetapka bisi siti agi kluster COVID19 baru iya nya Kluster Bukit Tunggal ba Pelilih Menua Julau ti bekaul enggau dua buah rumah panjai.
Sekretariat Komiti Mutarka Penusah Ngenyit Nengeri Sarawak(JPBNS)nengahpenerang berita kemari madah, kluster baru nya kluster komuniti.
Indeks kes kluster tu iya nya siku lelaki peranak menua (Sarawak) beumur 69 taun ti ditemu nengah pengawa meresa bisi tanda ba klinik pengerai kena 25 Februari 2021.
“Opis Pengerai Nengeri Sarawak sehari tu udah netapka siti kluster baru ba
Pelilih Menua Julau iya nya Kluster Bukit Tunggal.
“Kluster komuniti tu nyengkaum dua buah rumah panjai ba Nangga Lioh enggau Nangga Sebuntang ba kandang menua Bukit Tunggal, Durin, Julau.
“COVID-19 berampit ba entara peranak di Bukit Tunggal tu dipelaba bekaul enggau aktiviti beripai tauka gotong royong maya ngetau,” ku JPBNS, kemari.
Ku JPBNS, asil ari pansik tumu enggau pengawa nyidi kes chara aktif ba dua buah rumah panjai nya, bisi 28 kes nambah udah ditemu.
Berindik ari pekara nya, dua buah rumah panjai tu ba Nangga Lioh enggau Nangga Sebuntang udah dipejalaika atur Lockdown tauka enda dikemendarka pansut enggau tama sepeneka ati berengkah 1 Mac tu.
“Naka 6 Mac 2021, pukul 12 tengah hari, bisi 139 iku udah diperesa lalu ari penyampau nya bisi 29 kes ditemu positif COVID-19 nyengkaum indeks kes, 94 individu negatif enggau 16 individu agi nganti pemutus,” ku JPBNS.
Enggau penambah siti kluster baru nya, ngujungka penyampau semua kluster COVID-19 ke agi aktif bisi 26 kluster naka kemari.