221 kes baru positif, tiga pemati ketegal rampit COVID-19 di Sarawak kemari
KUCHING: Bisi 221 kes positif baru COVID-19 enggau tiga kes pemati baru ketegal rampit COVId-19 diripotka ba Sarawak, kemari.
Sekretariat Komiti Mutarka Penusah Ngenyit Nengeri sarawak (JPBNS) nengah penerang berita madahka, nya ngunjungka naka kemari kes positif COVID-19 nambah nyadi 10,895 kes enggau kes pemati nambah nyadi 87 iku.
“Sehari tu (Kemari) bisi 221 kes positif baru COVID-19 ditemu ba Sarawak. Tu ngujungka penyampau semua kes nambah nyadi 10,895 kes.
“Pelilih menua ti ngeripotka kes iya nya Pelilih Menua Sibu (79), Bintulu (33), Betong (32), Kuching (17), Kapit (12), Julau (10), Serian (10), Meradong (8), Miri (5), Sebauh (5), Bau (3), Selangau (3), Pusa (2), Sarikei (1) enggauTatau (1).
“Sehari tu mega bisi tiga (3) kes pemati baru ti dirampit COVID-19. Tu nyadika penyampau pemati ketegal rampit COVID-19 nambah nyadi 87 iku,” ku JPBNS, kemari.
Nitih penerang JPBNS, kes pemati ke-85 iya nya kes ke-8677 siku lelaki peranak menua (Sarawak) beumur 42 taun ti udah diperubatka ba Sepital Miri ketegal sendat seput.
Kes mega bisi tanda tabin enggau batuk, sereta asil beperesa COVID-19 ngena rapid molecular iya nya psotif COVID-19 kena 24 Februari 2021.
“Tikas pengerai kes majak enda manah sereta ditetap udah nadai kena 5 Mac 2021. Kes bisi ko-morbid penyakit jantung iskemia, darah tinggi, kemi manis, gout enggau dislipidemia,” ku JPBNS.
Kes pemati ke-86 iya nya kes ke-9,972 siku lelaki peranak menua (Sarawak) beumur 53 taun di dirujuk ngagai Sepital Bintulu ari sebuha sepital peribit maya ujian parid tesr kit antigen ditemu positif COVID-19.
Kes bisi tanda batuk enggau tabin beberapa hari sebedau nya. Ujian meresa COVID-19 ngena rT-PCR ditemu positif kena 2 Mac 2021.
“Tikas pengerai kes majak enda manah sereta kes ditetap udah nadai kena 5 Mac 2021. Kes bisi ko-morbid penyakit kemi manis enggau obesiti,” ku JPBNS.
Lalu kes pemati ke-87 iya nya kes ke-2,833 siku indu peranak menua (Sarawak) beumur 58 taun ti udah diperubat ba Sepital Sibu sereta kes bisi tanda batuk enggau tabin beberapa hari sebedau nya.
Ujian rT-PCR ditemu positif kena 21 Januari 2021 sereta tikas pengerai kes majak enda manah enggau ditetap udah nadai kena 5 Mac 2021. Kes mega bisi komorbid penyakit darah tinggi enggau dislipidemia.
“Komiti Mutarka Penusah Ngenyit Nengeri Sarawak (JPBNS) meri penyinu ati ngagai orang ke sebilik enggau kes,” ku JPBNS.
Nambahka nya, JPBNS ngeripotka kemari bisi 258 kes baru udah gerai sereta dikemendarka pansut ari Sepital Sibu (107), Sepital Bintulu (58), Sepital Besai Sarawak (48), Sepital Sarikei (18), PKRC Sepital Kapit (9), PKRC Sepital Sri Aman (8), Sepital Miri (7) enggau PKRC Sepital Betong (3).
Tu nyadika penyampau semua kes positif COVID-19 ke udah gerai sereta dikemendarka pansut ari sepital nambah nyadi 8,399 iku tauka 77.09 peratus ari semua kes COVID-19 ba Sarawak, ku JPBNS.
Kemari bisi 225 PUI baru diripotka enggau empat PUI ke agi nganti pemutus ujian makmal.