PKPD dipejalaika ba Genturung Pendiau Serumah, Padawan berengkah 7 Mac

KUCHING: Komiti Mutarka Penusah Ngenyit Nengeri Sarawak (JPBNS) bejalaika Atur Nagang Pemindah Diteritka Agi (PKPD) pengelama 14 hari berengkah ari sehari tu (7 Mac 2021) ba Genturung Pendiau Serumah, Padawan.

Sekretariat komiti nya madahka, pemutus nya dipejalaika berindik ari kes positif ti majak nambah ba genturung pendiau tu.

“Atur Nagang Pemindah Diteritka Agi (PKPD) ba

Genturung Pendiau Serumah, Padawan berengkah diterit tauka dipejalaika kena 7 Mac (12.01 pagi) ngagai 20 Mac 2021 (11.59 malam).

“Pemutus tu digaga laban kes positif ari genturung pendiau tu majak nambah,” ku JPBNS, kemari.

Kelimpah ari nya JPBNS ngeripot kemari Pelilih Menua Samarahan udah betukar status nyadi Oren ari status Mirah pengudah ngerikotka 35 kes berampit ba pelilih menua tu dalam timpuh 14 hari ke udah.

“Pelilih Menua Bukit Mabong mega udah pulai baru ngagai status Kuning ari status Oren pengudah ngerikotka 19 kes berampit ba pelilih menua tu dalam timpuh 14 hari ke udah.

“Pelilih Menua Tatau udah betukar ngagai status Kuning pengudah ngerikotka siti (1) kes berampit baru ba pelilih menua tu,” ku JPBNS.

Nambahka nya, Pelilih Menua Selangau, Betong, Meradong, Kuching, Kapit,

Bintulu, Miri enggau Sibu agi ba status Mirah enggau penyampau 2,712 kes berampit ba pelilih menua tu dalam timpuh 14 hari ke udah.

Lalu Pelilih Menua Kanowit, Sarikei, Serian, Julau, Subis, Bau, Dalat enggau Sri Aman mega agi ba ststus Oren.

Pelilih Menua Marudi, Mukah, Pusa, Song, Asajaya, Beluru, Saratok enggau Sebauh agi ba status Kuning, lalu 13 pelilih menua ke bukai agi ba status Gadung.