Projek ngemanah sistem bekal ai beresi di Sri Aman chakah dipejalai
KUCHING: Projek nyendiaka bekal ai beresi, nukar paip lama ngagai ke baru sereta nukar paip pantis enggau nambahka penguat ai ba Pelilih Menua Sri Aman benung chakah dipejalaika Opis Bekal Ai Menua Pesisir Bagi Menua Sri Aman.
Menteri Muda Pengelantang Pendiau Raban Bansa Datuk Francis Harden Hollis ngarapka enggau penembu semua projek nya ila peranak ba pelilih menua nya nadai agi betapi enggau penanggul bekal ai.
“Kitai beterima kasih ngagai JBALB laban ti chukup bebendar nyendiaka bekal ai beresi enggau berati sereta bejalaika nama ke patut bekaul enggau sebana rayat pasal kualiti ai, paip pantis, kurang kuat enggau penanggul paip lama ti dalam proses ditukar.
“Dikerapka nyema semua projek tu udah tembu ila, penanggul bekal ai udah ulih diputarka,” ku iya lebuh ti bejaku maya nemuai seraya bejalaika pengawa ngagai Opis Bekal Ai Menua Pesisir JBALB) Bagi Menua Sri Aman ba Bilik Baum opis nya di Jalan Bayu, Sri Aman apin lama.
Penemuai iya disempulang bala tuai raban bansa ti nyengkaum Pemanca Jegai Jawa, Pemanca Lee Siang Hua, Penghulu Tiong Chong Onn, Penghulu Mingging Sigan, Penghulu Kang Tai Kong, Kapitan Ling Siew Hung, Kapitan Tay Siaw Chuan enggau Ketua Kaum (KK) Jolly Ramli.
Harden berebak enggau tu ngingatka bala tuai raban bansa lebih agi ke sama datai mendingka penerang nya udah meretika pelin timpuh pandak enggai pelin timpuh panjai JBLAB.
“Bala tuai raban bansa patut nerangka ngagai rayat ke dijaga iya nya pasal pemendar JBALB nyendiaka bekal ai beresi sereta deka dipajakka,” ku iya lebuh ti nyimpul jaku ba aum nya.
Dulu ari nya Harden ti mega Kaban Kunsil Nengeri (ADUN) Simanggang enggau raban iya mendingka penerang pasal bekaul enggau bekal ai ba pelilih menua nya ari JBALB.
Jurutera Air, Opis Bekal Ai Menua Pesisir (JBALB)
Adzahari Baini lebuh ti meri penerang madahka, penembu semua projek nya ila dikearapka mutarka penanggul bekal ai ba pelilih menua nya.
“Diatu kereja ngemanahka agi kapasiti pemansut ai Bayai ti ngena ungkus belanja RM21 juta benung chakah dipejalaika sereta dipelaba tembu ba bulan Mei 2021.
“Lalu ba kandang menua
Batu Lintang Undop projek bekal ai menua pesisir (BALB) mega benung dipejalaika. Projek tu ti nerima ungkup belanja sepenyampau RM42 juta ari Opis Menteri Pemansang Menua Pesisir deka nyendiaka bekal ai beresi ngagai rumah panjai enggau genturung pendiau ba kandang menua Batu Lintang enggau Ulu Paku, Undop,” ku Adzahari.
Lebuh ti ngenang penanggul bekal ai ba kandang menua Menalang enggau Sungai Tenggak, Adzahari madahka, gaya tanah enggau kandang endur bebukit ngurangka penguat ai ti disalurka ngena paip 6 inchi.
Kena mutarka pekara nya, JBALB deka nganti paip 6 inchi ngagai 2 inchi, ku iya.
Nambahka nya ku iya, projek ngemanahka agi kapasiti pemansut ai ari 33.3 MLD ngagai 53.3 MLD ba Bayai (Empango) enggau Projek BALB kandang menua Batu Lintang, Undop dipelaba deka tembu ba bulan Julai 2021.
“Lalu pengawa nganti paip ka kandang Bandar Simanggang benung dalam proses ngaga. Bisi sekeda endur udah tembu ditukar.
“Entara kandang endur ke udah tembu disambung baru enggau ditukar iya nya kandang endur Genturung Pendiau Teratai ngagai Taman Teratai, Jalan Brayun, Market Baru Sri Aman, kandang endur Taman Nanang ba lot kedai baru enggau kandang endur RPR,” ku iya.