Nadai bayar tol ba semua jematan jalai tebing pantai
Nya setipak enggau juluk ati Ex-Kepala Menteri Niang Pehin Sri Adenan Satem (Tok Nan), ku Abang Johari
“
Nadai tol ba semua jematan di semanjai jalai tebing pantai. Nadai agi
” feri, lalu udah tentu nadai tol.
Datuk Patinggi Abang Johari Tun Openg
Kepala Menteri
KUCHING: Semua jematan ti dikena meraka sungai di nengeri tu nadai minta bayar tol setipak enggau juluk ati Ex-Kepala Menteri Niang Pehin Sri Adenan Satem (Tok Nan).
Kepala Menteri Datuk Patinggi Abang Johari Tun Openg madah, perintah nengeri nadai minta bayar tol taja pan servis feri di Sarawak deka diketuka beoperasyen enti semua jematan nya udah tembu digaga ila.
“Nadai tol ba semua jematan di semanjai jalai tebing pantai. Nadai agi feri, lalu udah tentu nadai tol.
“Nya mih ti dikeamatka Gabungan Parti Sarawak (GPS),” ku iya ba aum media pengudah bejadi pengerami nasih tanah Jematan Batang Lupar di Pengkalan Feri Sebuyau-Triso di Sebuyau ditu,keamri.
Ku Abang Johari, semua jematan ba semanjai jalai tebing pantai ti dipelanja perintah nengeri kelimpah Jematan Sadong enggau Samarahan ke ditanggung
Perintah Besai (dahulu) ari baruh Barisan Nasional (BN).
“Baka ke ditemu kita, suba bisi siku menteri kanan madahka Sarawak deka tengkerap dalam timpuh tiga taun laban utai ke digaga kitai nya masau duit kitai (ungkup pemansang). Tentu iya nemu nemu nama utai digaga aku.
“Peda Sempekat Malaysia1963 (MA63), kitai bisi hak ba minyak enggau gis. Kitai tetap neruska kes nya (hak minyak enggau gis) ba kort, lalu kort dipeda nyata ngarika sepiak kitai,” ku iya.
Ku Abang Johari, nengah peantai pemisi tambah ke diterima ari Chukai Dagang Nengeri (SST), nya deka dikena ngemansangka Sarawak.
“Berebak enggau nya, aku bisi madahka diri deka numbuhka duit turu nengeri ke dikena kitai semua jemah ila,” ku iya.
Dulu ari nya, lebuh ke bejaku, Abang Johari madahka bisi pemar ba pengawa ngaga Jematan Batang Lupar enggau jematan bukai laban ungkus ngaga nya ke besai.
Taja pia ku iya, perintah nengeri tu ulih ngiga belanja kena ngemansangka Sarawak taja pan perintah besai dipegai Pakatan Harapan (PH) ke sebedau tu nginsil projek nya.
“GPS deka majak ngemansangka kandang menua pesiisr laban nya endang patut dikemansangka, tambah mega nya tanggungpengawa kami.
“Pemaik ari nya, kita tau muka bidang baru sereta ngerembaika sosioekonomi mensia mayuh. Nengah pemisi penyambung, bala nembiak ulih mansang dalam mayuh bengkah bidang baka betanam betupi moden. Malah, kami mega deka ngemanahka agi akses internet lalu semua tu benung dipejalaika,” ku iya.
Ku Abang Johari, tagit GPS endang ungkup anak Sarawak jemah ila, tang kena nyamin pengidup sida jemah ila, enviromen enggau perengkaguna mesti manah magang.
“Kami gaga amat ati laban bisi penegap enggau pemereti ati ba kitai laban kitai bisi siti objektif iya nya ngemansangka nengeri tu nyadi nengeri ti pemadu maju nyerumba taun 2030.
“Ketegal nya, kami mesti nambahka perengkaguna baka elekterik, ai enggau pelajar,” ku iya.