Jalai ba kandang menua tebing pantai patut amat digaga: Masing
KUCHING: Pengawa ngaga jalai ba kandang menua semanjai jalai tebing pantai beguna amat kena ngangkatka tikas pengidup rayat nengeri tu.
Sapit Kepala Menteri Tan Sri James Jemut Masing madah, kebuah pia laban urung 65 peratus peranak nengeri tu diau ba kandang tebing pantai.
“Nya kebuah kitai patut ngaga mayuh agi jalai ba kandang tebing pantai.
“Mayuh agi jalai, reti nya mayuh agi jematan mesti digaga laban kena meraka sungai ke besai,” ku iya lebuh bejaku ba pengerami nasih tanah Jematan Batang Lupar ti dipenyadi Kepala Menteri Datuk Patinggi Abang Johari Tun Openg ditu, kemari.
Masing ke mega Menteri Infrastruktur enggau Pemansang Penyangkai Kapal madah, bisi 11 jematan besai ti aptut digaga kena nyadika penyambung semanjai jalai tebing pantai.
Ku iya, nya nyengkaum Jematan Batang Rambungan, Jematan Sejingkat, Jematan Sg. Krian,
Jematan Batang Lupar 1, Jematan Batang Lupar 2, Jematan Batang Rajang, Jematan Batang Paloh, Jematan Muara Lassa, Jematan Batang Igan, Jematan Bintulu - Jepak enggau Jematan Batang Saribas.
“Jematan tu digaga ngena ungkus nyauka RM4 bilion.
“Taja pan begunaka ungkus ke amat besai, kami mesti ngaga (jematan) laban enti enda, 65 peratus peranak Sarawak deka majak tinggal,” ku iya.
Ku Masing, opis menteri iya untung amat laban Kepala Menteri setuju enggau perambu sereta penyakah sida ngiga belanja kena ngaga jematan tu.
“Ngaga jematan iya nya setengah ari pengawa udah dipejalaika.
Pengawa nangkanka tu iya nya, Kepala Menteri ngiga belanja ngambika ulih ngaga jalai kena nyambungka jematan tu. Nyema nya enda dipejalaika, jematan nya enda ulih digaga.
“Pengawa ngaga jalai ba tanah kerapa enggau paya ti nyambung ngagai jematan nyadi siti agi pemar ngagai opis menteri aku. Jematan panjai ba nanga sungai enggau jalai penyambung ti semak enggau jematan tu nyadi siti pemar fizikal enggau belanja ngagai perintah kitai.
“Taja pia, kitai ungtung laban Kepala Menteri nemu chara ngiga belanja ari aset minyak enggau gis kena nyendiaka duit ke diguna ngaga jalai alun enggau 11 jematan nya,” ku iya.
Ku Masing, penyampau ungkus kena ngaga 11 jematan besai kena meraka sungai nya enggau jalai kena nyambung enda kurang ari RM11 bilion.