PETRONAS dipelaba nemu dua iti agi palan bisi minyak enggau gis
KUCHING: Kepala Menteri Datuk Patinggi Abang Johari Tun Openg madah, Petroliam Nasional Bhd (PETRONAS) dipelaba udah nemu dua iti agi palan bisi minyak enggau gis ba kandang menua tebing pantai di nengeri tu.
Ku Abang Johari, kompeni nya udah madahka pekara nya nggai iya lebuh ke nemuai meri basa, ensanus.
“Kelimpah ari minyak enggau gis ti ditemu ba Zon Luconia Tengah enggau Baram Delta bedau lama udah, dipelabaka mega kami nemu dua iti agi palan baru minyak enggau gis.
“Laban nya bepelasarka Sempekat Mutarka Chara Komersial (CSA), kami deka ngaduka bagi kami kena ngerembaika kandang endur nya nengah Petroleum Sarawak Berhad (PETROS).
“Utai ke digaga kami endang bepelasarka hak kitai dalam Konstitusyen,” ku iya ba aum media pengudah bejadi pengerami nasih tanah Jematan Batang Lupar di Pengkalan Feri Sebuyau-Triso di Sebuyau ditu, kemari.
Ku iya, PETRONAS deka ngemansutka penerang sida empu enggau silik bekaul palan baru ke ditemu sia nya.
Kena 25 Februari tu tadi, PETRONAS madahka bisi nemu gis ari telaga eksplorasi Dokong-1 dalam kontrak bekunsi pemansut (PSC) Blok SK417 ba kandang ai mabu Baram, urung 90 kilometer ari pantai Sarawak.
Mandal Presiden Kanan Pengurusan Petroleum Malaysia Petronas, Mohamed Firouz Asnan berkata, firma enggau enggau PSC benung beratika silik agi palan ke ditemu nya.
Tu palan kedua ditemu ba luar pantai Sarawak pengudah Petronas ngenukuka bisi nemu gis ari telaga Lang Lebah-2 ba Zon Luconia Tengah, kurung 80 kilometer ari tebing pantai nengeri tu 10 Februari tu tadi.
Sama bisi ba aum media nya, Sapit Kepala Menteri Tan Sri Datuk Amar Dr James Jemut Masing, Menteri Muda Pemansang Infrastruktur enggau Penyangkai Kapal Datuk Julaihi Narawi sereta bala temuai dipebasaka bukai.