Julaihi: Angkatka status Sebuyau nyadi pelilih menua
KUCHING: Perintah Sarawak dikearap ulih ngemendarka peminta ngangkatka status Sebuyau ari pelilih mit ngagai pelilih menua ba timpuh ke semak tu.
Menteri Muda Pemansang Infrastruktur enggau Penyangkai Kapal Datuk Julaihi Narawi madah, nya beguna amat kena ngerembai mayuh agi pemansang di menua nya sebaka enggau pelilih menua bukai di Sarawak.
“Tu endang juluk ati peranak di Sebuyau. Justeru, kami ngarapka Kepala Menteri Datuk Patinggi Abang Johari Tun Openg setuju sereta ngemendarka peminta ngangkatka tikas pelilih mit Sebuyau ngagai pelilih menua ba timpuh ke semak tu,” ku iya.
Iya madah munyi nya maya bejaku ba pengerami nasih tanah Jematan Batang Lupar ti dipenyadika Abang Johari di Pengkalan Feri Sebuyau-Triso di Sebuyau ditu, kemari.
Berebak enggau nya, Julaihi meri terima kasih ngagai perintah Sarawak laban ngaga projek Jalai Tebing Pesisir enggau Jalai Besai Kedua mansa kandang menua Sebuyau.
Ku iya, pengawa ngaga nya dipelaba tau meri empas besai kelebih agi ari segi pemansang sosio-ekonomi di pelilih Sebuyau enggau semua peranak Sebuyau.
“Pelilih mit Sebuyau diatu bisi urung 20,000 iku penyampau tubuh. Pasar mit Sebuyau enggau Pasar mit Sebangan, nyadi pasar mit tebing pantai dalam pelilih mit tu deka ngasaika pemaik ari pemansang jemah ila,” ku iya.
Ku Julaihi, Jematan Batang Lupar nya jematan ti pemadu strategik ba jalai tebing pan tai ke deka ditengah semua rayat di nengeri tu.
Ku iya, nya mega deka nyadi jematan ke pemadu panjai meraka Sungai di
Sarawak enggau di Malaysia.
“Nadai salah ba aku enti aku madahka Jematan Batang Lupar deka nyadi Raja Jematan di Sarawak sereta mega di Malaysia.
“Terima kasih ngagai perintah Gabungan Parti Sarawak (GPS) enggau Kepala Menteri kita ti udah mendingka sada enggau pinta rayat menua pesisir kelebih agi ba kandang tebing pantai,” ku iya.
Julaihi ke mega Kaban Kunsil Nengeri Sebuyau madah, pengerami nasih tanah Jematan Batang Lupar endang siti ari pengawa nasih tanah ungkup projek jematan enggau jalai tebimg pantai Sarawak ti dipenyadi Kepala Menteri (Abang Johari) kenyau ari 6 April 2019.
Pengerami nya ku iya, ti kelapan, ukai ditandu baka ke dipadahka sekeda orang ti enda ulih nerima perintah GPS Sarawak ulih ngaga jematan enggau jalai tebing pantai, baka ke diperambu sereta digaga ngena bajet perintah nengeri.
“Nyema projek tu enda dikinsil perintah Pakatan Harapan (PH), aku pechaya sehari tu, jematan nya udah manggai 50 peratus digaga,” ku iya.
Ku iya, pengawa perintah Pakatan Harapan (PH) nginsil projek besa nya suba patut nyadi ke lalau ngambika rayat Sarawak enda tepejuh runding enggau semaya manis raban orang nyerumba pengawa bepilih.
“Pemendar enggau pengulih perintah GPS patut nyadika tenggau lebuh datai ba maya pengawa bepilih ila.
“Pengawa ngaga jematan enggau jalai semanjai jalai tebing pantai ti mayuh genturung pendiau enggau rumah panjai nyengkaum ngaga Jalai Besai Kedua patut di peda nyadi ke pengeran perintah GPS Sarawak nentuka menua pesisir ulih mega ngasaika pemansang ke sebaka,” ku iya.
Sama bisi maya nya, Sapit Kepala Menteri Tan Sri Datuk Amar Dr James Jemut Masing, Kaban Parlimen Batang Lupar, Datuk Seri Rohani Abdul Karim enggau dipebasa ke bukai.