Projek ngaga Jematan Batang Lupar, ukai semaya balang
Siti agi pemansang dibai perintah Gabungan Parti Sarawak
KUCHING: Projek ngaga Jematan Batang Lupar ti nyambung Sebuyau enggau Triso ke pemanjai 4.8 kilometer ukai semina jaku ngapa.
“
Nya alai, nyema projek tu udah tembu digaga ila, nya deka nyadi jematan ke pemadu panjai di Malaysia. (Nya alai) sehari tu kitai ngamatka pengawa ngaga jematan tu ukai semina jaku aja.
Datuk Seri Rohani Abdul Karim
Kaban Parlimen Batang Lupar
Kaban Parlimen Batang Lupar, Datuk Seri Rohani Abdul Karim madah munyi nya laban bisi sekeda orang ti madahka projek jematan tu semina baka semaya balang aja.
Ku iya, pengawa ngaga Jembatan Batang Lupar siti projek besai ti begunaka ungkus ke amat besai, iya nya RM848 juta kelimpah begunaka perambu ke chukup manah ngambika ulih digaga enggau lanchar.
“Nya alai, nyema projek tu udah tembu digaga ila, nya deka nyadi jematan ke pemadu panjai di Malaysia. (Nya alai) sehari tu kitai ngamatka pengawa ngaga jematan tu ukai semina jaku aja.
“Tu nyadi hari besejarah sereta pengemun baru ngagai kitai kelebih agi peranak ngelingi kandang menua tu ngasaika siti agi pemansang ke dibai perintah Gabungan Parti Sarawak (GPS),” ku iya.
Iya madah munyi nya ba pengerami nasih tanah Jematan Batang Lupar ti dipenyadi Kepala Menteri Datuk Patinggi Abang Johari Tun Openg ba Pengkalan Feri Sebuyau-Triso di Sebuyau ditu, kemari.
Ku Rohani, sebedau tu pengawa ngaga Jematan Batang Lupar endang udah dikemendarka ti digaga nengah chara bekunsi entara Perintah Besai enggau Perintah Sarawak.
“Tang pengudah besilih perintah, projek tu dikinsil. Asa amat ati kitai nerima berita nya. Taja pia, Kepala Menteri kitai ti nemu pemesai guna jematan tu ba rayat ngambi inisiatif nampung projek jematan tu ke ditanggung perintah Sarawak magang.
“Berebak enggau tu, aku ngarika peranak Batang Lupar meri terima kasih ngagai Kepala Menteri enggau perintah GPS ti siru amat enggau utai ti diguna peranak ba kandang menua tu,” ku iya.
Ku Rohani, pengawa ngaga Jematan Batang Lupar endang siti ari pekara ti ditegika di Parlimen.
“Jematan tu semak amat dalam ati aku. Berengkah enggau peminta ke servis feri ungkup Sebuyau-Triso, nya singkang aku keterubah sebedau minta ngaga jematan.
“Kebuah pia, mayuh jam pejalai ulih dipandakka enti jematan tu udah tembu digaga ila ke amat dianti peranak dalam Parlimen Batang Lupar sereta mega semua rayat Sarawak,” ku iya.