RM14.3 juta dikemendar kena nyambung ai beresi ngagai enam rumah panjai di Ulu Roban
KUCHING: Pengudah projek nyambung bekal ai beresi ti begunaka belanja sepenyampau RM14.3 juta ngagai kandang menua Ulu Roban tembu digaga ila, nya deka meri penguntung ngagai peranak ba enam buah rumah panjai ti kena bungkur projek nya.
Sapit Menteri Kuasa enggau Pengeraja Asal, Datuk Ali Biju madahka projek nya udah dikemendarka Opis Menteri Pemansang menua Pesisir (KPLB) dalam bulan Januari 2021.
Iya madahka projek nya dipasukka dalam Langgur Pemansang Malaysia Lumpar Ke-12 (RMK-12) ti dipelanja KPLB sereta Opis Bekal Ai Menua Pesisir (JBALB) nyadi ejensi ti bejalaika projek nya.
“Projek tu mungkur skop kereja baka nyambung paip mayuh saiz sepemanjai 14 kilometer, sebuah palan nakung ai, sebuah ‘booster station’ enggau kereja bukai ti bekaul, ti deka meri penguntung ngagai peranak ba enam buah rumah panjai ke api ngasaika perengkaguna mensia mayuh tu.
“Baka ti dipadah ngagai aku, projek tu benung dalam proses nyiri konsultan enggau dipelaba deka ditinda ba renggat (suku) keterubah taun 2022,” ku iya ti mega Kaban Parlimen Saratok nengah sebengkah penerang, kemari.
Nitihku Ali kena 26 Februari
2021, iya bisi nemuai meri basa ngagai Opis Menteri Utiliti Sarawak.
Maya penemuai nya iya mendingka penerang silik ari Sekretari Mendam Opis Menteri Utiliti Dato Ir. Alice Jawan enggau Pemesai Kanan Opis Menteri nya sereta JBALB Kuching enggau Betong, pasal projek bekal ai ba sitak Parlimen Saratok kelebih agi ba Ulu Roban.
“Aku meri terima kasih mayuh ngagai Perintah Nengeri Sarawak ti seruran nyukung enggau nyaga pemansang infrastruktur ba sitak Parlimen Saratok.
“Aku deka matau pemansang projek tu belama,” ku iya ti mega Kaban Kunsil Nengeri Krian.