Bisi 3,224 iku kaban PBB Pakan nerima kad nyadi kaban parti

PAKAN: Bisi 3,224 kaban Parti Pesaka Bumiputera Bersatu (PBB) pampang Pakan nerima kad nyadi kaban sida ba pengerami mit ti diatur ba opis pampang parti nya ditu, Hari Enam minggu nyin tadi.

Sida entara 6560 kaban baru, ke tebal agi ex-kaban Sarawak People Energy Party (Teras) ti minta nyemilik PBB dalam taun 2016, nitihka singkang Presiden sida, Tan Sri William Mawan Ikom ti udah nyemilik PBB ba taun 2016.

Mawan ti udah dichiri nyadi kaban kaunsil besai PBB ke mega nyadi Kaban Kunsil Nengeri sitak N.47 Pakan, udah dikangau bejadi pengerami nya.

Ilebuh ke bejaku, Mawan madahka pemesai reti kaban parti beserakup laban nya ngujungka sida ulih bejalaika pengawa enggau manah ngagai komuniti.

Iya ngelalau sida nyaup negika parti, komited nyapai visyen enggau misyen lalu semampai ngemeratka parti ari peneka diri empu.

Sentang kad nyadi kaban nya, Mawan madahka bisi 3,224 iti nya ungkup peminta baru ti udah diproses sereta dikemendarka indu opis PBB, seraya madahka kad ungkup sida bukai ke minta nya dipelaba deka bisi enda lama agi, laban iya bisi dipadahka semua nya mega udah dikemendarka.

Sapit chairman PBB pampang Pakan, Kunsilor Gasan Empera madahka diri gaga ati laban kaban PBB pampang

Pakan majak nambah kenyau ari taun 2017.

Iya pechaya, PBB nyadi parti ke dipilih berindik ari penyulut trek rikod ngintu peneka rayat kelebih agi di menua pesisir.

Berebak enggau nya, ketegal nitihka atur Standard operasyen prosedur (SOP) kena ngelaban Covid-19, semina chairmen enggau sekeda kaban komiti pampang mit PBB aja dikemendarka datai baka ari Nasau, Lemujan, Babai, Wak enggau Nyalak.

Sama bisi ba pengerami nya Sekretari pampang PBB Pakan, Alum Tundan; Ketuai Indu, Nunsong Kalang; Ketuai Nembiak, Nyawin Sirai; Penghulu Dandan Bujang enggau Penghulu Dungggok Megong

UDAH NYADI KABAN: Mawan (empat kanan) nyuaka kad nyadi kaban ngagai chairman PBB pampang mit Wak, Janang Silang (flima kiba) seraya di kemataka Gasan (tiga kanan)enggau bala bukai.

UNGKUP KABAN BARU: Mawan (empat kiba), Gasan (tiga kiba) enggau bala bukai mandangka kad nyadi kaban PBB ti deka disadung ngagai kaban baru PBB pampang Pakan .