Penemu Jimbun nyima ati kaban PBB pampang Pakan
PAKAN: Penerang ti dipansutka Chairman Pampang Parti Pesaka Bumiputera Bersatu (PBB) Pakan, Jimbun Radin sentang penau chalun Gabungan Parti Sarawak (GPS) ngenanka kerusi Pakan ba Pengawa Bepilih Nengeri Ke-12 ti deka datai, enda ngelantangka ati kaban komiti (pampang Pakan) enggau kaban parti nya.
Sapit Chairman PBB Pakan, Kunsilor Gasan Empera madahka penerang ti dipansutka Jimbun maya merarau ba Pengerami Hari Orang Indu Sedunya ti diatur Parti Demokratik Progresif (PDP) pampang Pakan ba sebuah restoran di Sarikei bedau lama udah ngasuh saru runding, nadai tanggungpengawa enggau bula.
Jimbun ti beri basa bejaku ba pengerami nya bisi dipansutka ba surat berita (Utusan Borneo) ti madahka PBB Pakan meri sukung penuh ngagai chalun PDP, Edwin Bandang ngambi ngetanka kerusi Pakan ungkup GPS ba pengawa bepilih ke deka datai.
Iya (Jimbun) madahka PBB ti nyadi tulang belakang GPS deka mulaika kerusi Pakan ngagai PDP, pia ku Gasan.
Penerang nya endang enda patut ba pampang PBB Pakan laban naai ngembuan penemu nya, tambah mega PBB Pakan nadai pematut mansutka penerang ke baka nya, ku iya seraya madahka Jimbun patut nemu, penerang bekaul enggau chalun GPS nya prerogatif Kepala Menteri ke mega chairman GPS.
Jimbun udah meri penerang ke salah sentang gaya penemu PBB ba kerusi Pakan laban nya mega prerogatif Presiden PBB ke mega kepala menteri, ku iya.
Taja pia, iya enda tekenyit ati ninga penerang negatif Jimbun sentang pampang PBB Pakan, laban iya udah ngenyauhka diri ari semua aktiviti, program enggau pengerami ti diatur sida ngelama tu, ku Gasan seraya madahka Jimbun ditemu regas amat ngelakuka parti bukai.
Naka ke ditemu PBB Pakan, semua kaban parti ti talukka parti nya udah chakah amat gawa negapka parti sereta nguji ngambi pulai penyulut parti nya ke suba.
“Ke rikod, kerusi Pakan dimenang chalun PBB, Mandi Sanar ba pengawa bepilih keteru bah dalam taun 1969 lalu diatu kerusi nya diambi Tan Sri William Mawan ti mujur ngetanka kerusi nya ba pengawa bepilih taun 2016 ti nyadi chalun terus BN,” ku Gasan.
Semua penyukung ti talukka Mawan mega udah nitihka singkang iya minta n yadi kaban PBB, ku iya.
Ba pekara tu, Jimbun ti nyadi chairman PBB pampang Pakan patut beterima kasih meda parti nya majak mansang nyadi kering sekering, ku Gasan seraya madahka ari semina 940 iku kaban aja ba taun 2016, PBB Pakan diatu bisi 7500 iku kaban.
Penambah ke mayuh nya nyadi laban kaban TERAS ti betuaika Tan Sri William Mawan Ikom minta bebala mayuh nyadi kaban PBB nengah pampang Pakan dalam taun 2017, ku iya.
“Jimbun patut ngelaluka kaban baru sereta nyendiaka diri bejalaika tanggungpengawa baru ngemudika parti dominan ke ukai semina matak mayuh kaban baru tang mega pengari rayat. Tambah mega, peminta sida nyemilik PBB udah diproses sereta dikemendarka indu opis partis,” ku Gasan.
Nyempulang Gasan maya meri penerang nya ngagai Borneo Post bedau lama udah, Sekretari PBB pampang Pakan, Alum Tundan.