Penerebai khas ungkup nembiak Sarawak belajar di Sabah
KUCHING: Komiti Mutarka Penusah Ngenyit Nengeri Sarawak (JPBNS) enggau kompeni penerebai bilun dikearap ulih berundingka peminta ari nembiak Sarawak ti belajar di Sabah, minta nyendiaka operasyen penerebai khas disediaka ari Kuching enggau Miri ke Kota Kinabalu.
Menteri Perengka Pengangkut Sarawak, Datuk Lee Kim Shin madahka nya berindika ari nembiak Sarawak ti deka pulai ke kampus sereta ulih nampung semester baru ti berengkah 5 April 2021.
Ku Lee nitihka peminta nya, opis menteri udah nanya sereta minta diperundingka kompeni Penerebai Malaysia, AirAsia, Malindo enggau Maswing ngambika ulih nyendiaka penerebai khas ari Kuching enggau Miri ke Kota Kinabalu.
“Apin lama, kami bisi nerima peminta ari nembiak Sarawak ti belajar di Sabah ngambika bisi penerebai ari Kuching ke kota Kinabalu
enggau ari Miri ke Kota Kinabalu.
“Ke tuju tu, kami ngelalau nembiak ngambika betanya terus ngagai kompeni penerebai bekaul enggau atur meli tiket, awakka udah nya kompeni penerebai ulih minta penerebai khas ari JPBNS nuju palan ke dipadahka di atas (ari Kuching enggau Miri ke Kota Kinabalu).
“Kami ngarapka nengah chara tu ulih mantu nembiak kitai pulai ke kampus sereta ulih nampung semester baru sida nitih ti udah ditetapka ti deka dipejalaika nengah chara fizikal berengkah 5 April 2021,” ku iya nengah sebengkah penerang, kemari.
Dulu ari nya Lee madahka opis menteri iya enggau JPBNS bisi nerima peminta ari kompeni penerebai bekaul enggau penerebai tambah ari Sarawak ke Sabah enggau Semenanjung Malaysia.
Nitihku iya peminta nya udah dipansik sereta dikemendarka JPBNS bepelasarka ‘case-to-case basis’.
“Sehari tu (kemari), JPBNS udah ngemendarka peminta AirAsia ti deka beoperasyen ngena chara penerebai (tauka penerebai nadai orang tambang tauka penatai pemisi) ari Kota Kinabalu ke Miri enggau penerebai komersial orang tambang ari Miri ke Kota Kinabalu kena 1 April enggau 10 April 2021.
“AirAsia mega deka bejalaika operasyen penerebai feri (tauka penerebai nadai orang tambang tauka penatai pemisi) ari Kota Kinabalu ke Kuching enggau penerebai komersial orang tambang(commercial passenger flight) ari Kuching ke Kota Kinabalu kena 2 April enggau 9 April 2021.
Kelimpah ari nya, kena 2 April 2021, AirAsia mega deka bejalaika operasyen penerebai feri ari Johor Bahru ke Kuching enggau penerebai komersial orang tambang ari Kuching ke Johor Bahru,” ku iya, kemari.