141 kes positif baru COVID-19 di Sarawak kemari

KUCHING: Bisi 141 kes positif baru COVID-19 diripotka ba Sarawak, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, nya nyadika penyampau kes COVID-19 ba nengeri tu nambah nyadi 14,655 kes.

“(Ari 141 kes baru nya) pelilih menua ti ngerikodka kes iya nya Pelilih Menua Miri (34), Bintulu (27), Serian (25), Sibu (17), Samarahan (9), Kuching (8), Tebedu (6), Tanjung Manis (5), Sarikei (3), Kanowit (1), Kapit (1), Meradong (1), Mukah (1), Selangau (1), Sri Aman (1) enggau Subis (1).

“Ari penyampau 141 kes baru ti diripotka iya nya bisi 93 kes asil ari meresa individu ti bisi kontak ngagai kes positif COVID-19 (12 iku bisi tanda); 28 kes asil meresa individu dalam kluster aktif ke endang udah bisi (dua iku bisi tanda); semilan kes asil ari meresa individu bisi tanda ba fasiliti pengerai.

“Sereta bisi lapan kes iya nya asil ari beperesa bukai ba fasiliti pengerai (siku bisi tanda); dua kes bekaul enggau individu pulai ari nengeri bukai dalam Malaysia ti dikategori nyadi kes Import B enggau siti kes baru bekaul enggau individu ke pulai ari menua luar (Import A) iya nya ari menua Amerika Syarikat,” ku JPBNS, kemari.

Nambahka nya JPBNS mega ngeripotka kemari bisi 118 kes baru udah gerai sereta dikemendarka pansut ari Sepital Bintulu (27), Sepital Sibu (22), Sepital Miri (20), Sepital Besai Sarawak (19), PKRC Sepital Kapit (11), PKRC Betong (8), Sepital Sarikei (7), PKRC Serian (2), PKRC Mukah (1) enggau Sepital Limbang (1).

Tu nyadika penyampau semua kes positif COVID-19 ke udah gerai sereta dikemendarka pansut ari sepital nambah nyadi 11,915 iku tauka 81.30 peratus ari penyampau semua kes COVID-19 ba Sarawak, ku JPBNS.

Pia mega bisi 141 PUI baru udah diripotka enggau nadai PUI ti nganti pemutus makmal.

Kelimpah ari nya , JPBNS mega ngeripotka status ba nengeri tu iya nya Pelilih Menua Tebedu betukar nyadi status Kuning enggau Pelilih Menua Tanjung Manis betukar ngagai status Oren.

“Sehari tu (Kemari) Pelilih Menua Tebedu udah betukar status ari status Gadung ngagai status Kuning pengudah enam kes berampit baru ba pelilih menua tu.

“Pelilih Menua Tanjung Manis mega udah betukar status ari Kuning ngagai status Oren pengudah ngerikodka sepenyampau 24 kes berampit ba pelilih menua tu dalam timpuh 14 hari ke udah,” ku JPBNS.