JKNS ngenukuka Kluster Chupak siti kluster baru di Sarawak

KUCHING: Sarawak ngerikodka siti kluster baru COVID-19 enggau siti kluster udah ngetu berindik ari nadai agi ngerikodka kes baru, kemari.

Sekretariat Komiti Mutarka Penusah Ngeyit Nengeri Sarawak (JPBNS) nengah penerang berita madahka, kluster baru nya ditemu ba Pelilih Menua Serian.

Kluster baru rampit COVID-19 nya ditetapka Opis Pengerai Nengeri Sarawak nyadi Kluster Chupak, Serian, ku JPBNS.

“Kluster Chupak, Serian iya nya siti kluster komuniti ti ditemu ba Genturung Pendiau Chupak, Siburan ba Pelilih Menua Serian.

“Indeks kes kluster tu iya nya kes ke-11,561 siku indu peranak menua (Sarawak) beumur 27 taun, ti ditemu nengah pengawa meresa individu bisi tanda kena 9 Mac 2021.

“Kes ti gawa ba Pelilih Menua Kuching dipelabaka udah dirampit nengah rampit komuniti, lalu udah nya ngerampit sida sebilik enggau kes indeks sereta ngagai individu bukai ba Genturung Pendiau Chupak maya begulai enggau pangan diri enggau kontak semak,” ku JPBNS, kemari.

Asil ari pengawa nyidi kontak semak enggau kes indeks (Kluster Chupak, Serian) bisi 338 individu udah diperesa ti nyengkaum individu ari Pelilih Menua Serian enggau Samarahan.

Ari penyampau nya (338 individu), bisi 57 kes udah ditemu positif COVID-19 nyengkaum indeks kes; 41 kes negatif enggau 240 kes agi nganti pemutus.

Semua 57 kes udah dianjung sereta dipasukka ba Sepital Serian,Sepital Besai Sarawak enggau PKRC Serian awakka ulih diserara sereta diperubatka, ku JPBNS.

“Kelimpah ari nya, sehari tu (kemari) mega Opis Pengerai Nengeri Sarawak udah netapka siti kluster udah ngetu iya nya Kluster Geronggang, Sibu berindik ari ti nadai agi ngerikodka kes baru dalam timpuh 28 hari,” ku JPBNS.

Berindika ari pekara nya, naka kemari bisi 31 kluster COVID-19 ke agi aktif sereta ari penyampau nya bisi enam kluster ngeripotka bisi nambah kes, lalu 25 kluster agi nadai nambah kes.