Andy Jong sekali agi dichiri nyadi Presiden NSJA penggal 2021-2022
MIRI: Ketuai pengarang berita Sin Chew Daily News Andy Jong sekali agi diberi mandat neruska tanggungpengawa nyadi Presiden Gerempung Pengarang Berita Sarawak Utara (NSJA) ungkup penggal 2021-2022.
Pengawa nyiri Andy megai tanggungpengawa tu udah dipadahka maya Aum Besai Ninting Taun (AGM) sereta Pengawa Nyiri Komiti Ungkup Penggal 2021-2022 gerempung nya ti dipejalaika ditu kemari.
Andy ke nyadi presiden NSJA kenyau ari taun 2017 udah nerima sukung selubang sepenemu ari semua komiti ti datai.
Sama ngetanka tanggungpengawa nyadi Mandal Presiden ungkup penggal baru iya nya Rosemaria Buma ari Utusan Borneo.
Empat kaban eksko ke sama dichiri maya aum tu iya nya Michelle Choo nyadi sekretari, Mohd Aliff Idzwan Abdullah (penulung sekretari), Chai Chon Chin (tukang wang) enggau Esther Ching (penulung tukang wang).
Pia mega semilan iku komiti bukai ti sama dipilih iya nya Cindy Lai Pek Sian (Borneo Post), Lee Cheng Choi (See Hua Daily News), Huang Ung Key (See Hua Daily News), Catherine Igang (RTM), Noriza Jau (RTM),
Alan Yong (Sin Chiew Daily News), Liew Li Mui (United Daily News), Margareth Ringgit (New Sarawak Tribune) enggau Liong Chai Ling (Ututsan Sarawk).
Pia mega Rick Wong ari See Hua Daily News dichiri nyadi juruaudit ungkup penggal baru tu.
Dulu ari nya dalam jaku pengelalu iya bejadika pengawa tu, Andy madahka NSJA udah ngatur mayuh macham aktiviti semanjai taun nyin kemari taja pan betapi enggau pengelekai pandemik COVID-19.
“NSJA uda ngatur mayuh macham program tanggungpengawa rama korporat (CSR) taun nyin kemari ti udah nerima mayuh timbal ti positif ari komuniti.
“Kelimpah ari nya, NSJA mega udah ngambi inisiatif bejalaika projek CSR ke bukai baka ngaga ikon ungkup mengeri besai Miri enggau rambai jaku ‘Sayangi Miri’ ti udah dipadahka maya pengerami makai lemai ngintu 45 taun NSJA taun nyin kemari,” ku iya madah.
Ku iya, projek ngemansangka ikon tu udah ngena belanja sepenyampau RM45,000 lalu agih belanja ungkup projek tu udah digumpul tang enggai enda pan ditangguhka dulu taun nyin kemari ketegal pandemik COVID-19.
Beserimbai enggau nya, Andy ngarapka projek tu ulih dipejalaika taun tu ngambika tu ulih meri empas ti besai agi ngagai sektor dagang temuai di menua tu.