Dua pekebun di Bekenu mujur nanam pun rian ti bisi kualiti tinggi
MIRI: Dua pekebun di Bekenu ditu, mujur ngayanka sida ulih nanam pun rian ti bekualiti itnggi baka Musang King enggau lima bansa rian ke bukai, enggau manah ba tanah pemesai 12 ikar, taja pan kurang penemu sereta peneleba baka bala bakih di Semenanjung Malaysia.
Berindik ari nya, kena ngenuku sereta ngenang pengeransing seduai ti udah bejalaika komitmen enggau manah, perintah nengeri udah meri seduai input betanam betup ti nyadika pengawa mantu ngangkatka infrastruktur sereta servis sukung.
Beserimbai enggau nya sebuah kompeni baja bio ti bepalan ba Miri udah meri produk sida ngagai kededua pekebun tu lalu ngarapka nya ulih meri sduai asil ti pemadu manah lebuh ti bulih asil keterubah ke dipelabaka deka bisi dalam taun tu.
Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail madahka opis menteri nya, nengah Opis Betanam Betupi deka meri bantu sepenyampau RM20,000 ke bela nyengkaum servis sukung ngagai seduai.
“Kitai (opis menteri iya) endang ngarapka deka meda asil keterubah ti diambi ari ladang tu,” ku iya, pengudah ngelawa kebun rian ti diempu Mohamad Momen, 60, enggau Jamani Jamiran, 65, ba Genturung Pendiau Padang di Kelulit, Bekenu kemari.
Nadai sebarang bantu ar perintah sebedau tu, kededua pekebun nya ngaku madahka produktiviti seduai endang napi pemar sereta lubah kenyau ari berengkah betanam di kebun sida urung lima taun ke udah.
Taja pia enggau berkat sereta pengeransing, seduai diatu udah bisi ngembuan 500 pun rian, nyengkaum ari species Musang King enggau Black Thorn ti diatu ba renggat ngemansutka buah lalu bisi peminta ti tinggi ba dagang.
Dr Rahman optimis kededua kebun tu deka ngasilka buah rian ti benung digiga, dalam taun tu enggau pengawa ngatur ti betul ari kededua pekebun chunto nya.
Seduai ti ngaku endang pedis deka nyaga benih Musang King enggau Black Thorn ti tusah deka idup ba renggat keterubah tumbuh, nyentukka enggai enda pan melanjaka semua belanja ke bisi kena nentuka pun nya terus idup bagak lalu tumbuh enggau manah.
Nemu penusah sereta ungkus ti besai kena nentuka pun rian nya terus idup enggau manah lalu mujur ngasilka buah ti deka meri penatai pemisi ti besai, nya alai seduai nguji minta bantu ti keterubah ari perintah.
Dr Rahman ti udah besetuju deka mantu, udah ngemendarka peminta sida ungkup pam ai lalu ngemanahka pegung sereta jalai tama ke ladang seduai, ari baruh agih belanja opis menteri nya.
Iya mega madah, perintah nengeri endang nyukung pengawa ngena teknologi gadung dalam ngangkatka asil ke lalu ulih ngurangka tikas penurun pemanah tanah, baka ti dikena sektor betanam di menua bukai ba dunya diatu.
Ku iya, tu mega seriris enggau pengeransing perintah nengeri Sarawak ke deka nyapai juluk nengeri tu ti nyadi pengeksport produk pemakai ba Malaysia datai ba taun 2030.
Beserimbai enggau nya, Mohamad enggau Jamani meri besai terima kasih ngagai
Dr Rahman ti udah mantu input ladang kena mutarka penanggul bekal ai ari pegung ti ngemuntangka pengawa meri utai tanam ai.
Sama nyempulang Dr Rahman ngelawa kebun sida kemari iya nya Menteri Muda Orang Indu, Ruang Bilik enggau Pemansang
Nembiak Mit Datuk Rosey Yunus ke mega Kaban Kunsil Nengeri (ADUN) Bekenu sereta ADUN Lambir Ripin Lamat.