Pelajar tumu nembiak mit patut dikemerat
Laban menua endang begunaka raban ti pintar, landik kena neruska pemansang menua
SRI AMAN: Menua endang begunaka raban ti pintar sereta landik kena neruska pemansang menua, pia ku Penulung Pemesai Pemansang Komuniti Opis Pemansang Komuniti (KEMAS) Bagi Menua Sri Aman Wan Habeeb Wan Ahmad.
Berindik ari nya, pelajar patut dikemeratka ba tetiap renggat ngambika raban ti diadaka nya bisi kualiti tinggi lalu ulih besemekih dalam dunya ti majak napi pemar.
“Anak ti ngulihka penemu berengkah ari renggat tabika enggau taska patut dikemerat laban nya pun sida nyingkang ngagai pekara pelajar keben
dar,” ku iya.
Iya madah munyi nya lebuh ti bejaku maya Pengerami Nyuaka Kunchi Begunana Tabika KEMAS Kem Pakit ditu, kemari.
Wan Habeeb ke mega Suprvisor Prasekula Opis KEMAS Bagi Menua Sri Aman madah, ngemeratka pelajar raban rebak baru enda ulih lari ari juluk ngadaka paling enda sampai nyadi graduet.
“Nyema kitai nganjung anak ke sekula deka ngulihka penemu, bakani juluk nya ulih dijapai?
“Pemar ke bisi ba mua kitai endang besai nyema anak enda dibekalka enggau penemu ti nyadi reta ti pemadu berega ungkup pengidup dudi hari ila,” ku iya nyemetak.
Beserimbai enggau nya, iya mega ngelalau apai indai ngambika seruran ibuhka penunga bala anak sida penudah tembu sekula lalu seruran nentuka sida ngaga aktiviti ti manah.
“Nyadi apai indai kita enda patut ngengkahka tanggungpengawa nyaga anak kita ngagai pengajar aja tang kitai sama megai tanggungpengawa ti sama,” ku iya nambah.
Dulu ari nya, pengawa nyuaka kunchi begunana baru ngagai Opis KEMAS Bagi Menua Sria Aman udah dipenyadi Pegawai Memerintah Batalion Ke-13 Rejimen Askar Melayu Diraja Kem Pakit Leftenan Kolonel Mohd Rizal Mohd Ali.
Sama bisi ba pengerami nya Pemesai Pemansang Komuniti ba Opis KEMAS Bagi Menua Sri Aman Kelvin Lambai.
Tabika KEMAS Kem Pakit tu ngajar 37 nembiak mit dalam tiga kelas iya nya Kelas A, B enggau C.
“Anak ti ngulihka penemu berengkah ari renggat tabika enggau taska patut dikemerat laban nya pun sida nyingkang ngagai pekara pelajar kebendar. v
Wan Habeeb Wan Ahmad
Penulung Pemesai Pemansang Komuniti Opis KEMAS