Ujan bangat udah ngujungka SJKC Sing Ming putus jalai laban ampuh bah
SARIKEI: Ujan ti bangat ke enda ngetu kenyau ari dua hari berengkah Hari Dua nyin tadi udah ngujungka sekeda tikas penalam ai sungai niki lalu diatu ba tikas bejejaga.
Gaya tu mega udah ngujungka sekeda kandang menua ti baruh udah napi penusah ampuh bah.
Ketuai Balai Bomba enggau Penyelamat Sarikei, Mahmudin Narudin madah, bisi nerima siti ripot ngenyit bekaul enggau gaya ampuh bah di kandang menua tu iya nya ari Sekula Primari Bansa China (SJKC) Sing Ming, Kim San, Sarikei.
“Pengudah nerima kangau ngenyit nya bisi empat iku raban bomba udah dianjung ke palan nya lalu beratika jalai besai ti nuju ke sekula nya udah putus laban ampuh bah penalam 2 kaki.
Berindik ari nya, raban bomba ti bejalaika tanggungpengawa udah mantu raban sekula mindahka bala nembiak sekula ti tepekul di sekula ke jalai besai ti likun agi.
“Dalam operasyen tu, bisi 22 iku nembiak sekula nya udah mujur dipindahka ti mungkur 17 iku nembiak lelaki lalu lima iku nembiak indu ari Primari 1 nyentukka Primari 6,” ku iya madah ngagai media kemari.
Proses mindahka bala nembiak ari sekula nya udah diatur enggau manah lalu nerima bantu ti sama ari bala pengajar sekula nya mega.
Nitih ku Mahmudin, pengawa mindahka bala nembiak sekula nya udah digaga urung nyau deka sejam.
“Pengawa mindahka bala nembiak sekula ke palan ti likun agi udah diatur enggau manah lalu nadai penusah ti dikenggai nyadi.
“Beserimbai enggau nya mega, raban bomba deka ngaga siti pengawa matau ti meruan di kandang menua nya, kelebih agi lebuh ujan ti bangat agi nyadi lalu pia mega bisi ai pasang besai ti dipelabaka deka nyadi pagila (Hari Lima),” ku Mahmudin nambah.