Pinta Sarawak deka diperunding enggau ati ti rurus
KUCHING: Menteri Besai Tan Sri Muhyiddin Yassin meri jamin semua pinta Sarawak deka diperundingka enggau nadai bechiping setipak enggau Konstitusyen Perintah Besai sereta Sempekat Malaysia 1963 (MA63).
“Aku meri pengarap tinggi ngambika isu ti dibantai deka ulih diputarka nengah chara ti pemadu engkeman.
“Lalu ari nya kaul entara Perintah Besai enggau Perintah Sarawak deka lebih tegap enggau majak rat ti meri pemanah sereta nguntungka rayat,” ku iya.
Muhyiddin mansutka pekara nya lebuh bejaku Majlis Jamuan Negeri nyerumba penemuai iya seraya bejalaika pengawa ke Sarawak ti diatur ba Dewan Santapan Begunan DUN Sarawak ditu, malam ensanus.
Dulu ari nya, iya bekunsi pemujur ke udah dijapai Kaunsil Khas MA63 maya baum keterubah diatur kena 2 Disember 2020.
Entara pekara diputuska iya nya numbuhk tiga Komiti Kereja ti baru iya nya Komiti Kerja Kaban Segempung, Komiti Kereja Pengelikun Nengeri Sabah enggau Sarawak enggau Komiti Kereja Sosioekonomi.
Tuju numbuhka tiga komiti nya ku iya, ngambika ulih meri langgur penemu ngagai Kaunsil Khas MA63 pasal perambu mutarka isu spesifik bekaul enggau undangundang ungkup kaban segempung, pengelikun nengeri enggau sosioekonomi setipak enggau hak Sabah enggau Sarawak dalam langkar undang-undang menua.
Nitihku iya, tiga komiti nya udah ngatur aum keterubah ba timpuh suku keterubah taun 2021 lalu bisi sekeda perambu ti bekaul enggau ubah Konstitusyen Perintah Besai pasal hak Sabah enggau
Sarawak ti udah dipansik Komiti Kereja Kaban Segempung.
Entara pekara nya ku iya, bekaul enggau pekara imigresyen, rejista bansa, nyaga garis entara menua, penatai orang enda beradat enggau penama enda beradat orang berikan menua luar dalam Zon Ekonomi Eksklusif, udah dikerandauka Komiti Kereja Pengelikun Sabah enggau Sarawak.
“Kelimpah ari nya isu bekaul enggau pemansang sosioekonomi Sarawak baka isu penyeranta sereta infrastruktur jalai alun, infrastruktur pengerai, infrastruktur pelajar, bungkur internet enggau telekomu-nikasyen, duti setem ti dipejalaika ba suratchara betukar nama orang empu, chaj enggau suwa tanah ari baruh Ordinan Tanah Sarawak enggau pemeri khas ngagai Sarawak ari baruh Perkara 112D Konstitusyen Perintah Besai mega udah dikerandau Komiti Kereja Sosioekonomi.
“Tiga Komiti Kereja tu deka mantaika ripot sereta meri langgur penemu pasal pekara ti dikerandau ba renggat komiti ngambika ulih diputuska dalam Aum Kaunsil Khas MA63 ti deka bechairmanka aku minggu baru,” ku iya.
Sama bisi ngulu pengerami nya, Kepala Menteri Datuk Patinggi Abang Johari Tun Openg enggau bini iya Datuk Amar Juma’ani Tun Tuanku Bujang, Sapit Kepala Menteri Datuk Amar Douglas Uggah Embas, Tan Sri Datuk Amar James Jemit Masing enggau Datuk Amar Awang Tengah Ali Hasan, Speaker Kunsil Nengeri Sarawak Datuk Amar Mohamad Asfia Awang Nasar, Sekretari Perintah Nengeri Datuk Amar Jaul Samion enggau raban menteri perintah besai enggau nengeri sereta sapit menteri enggau menteri muda.