Kpg Baji, Sungai Rassau kena pentin PKPD berengkah 3 April

KUCHING: Kampung Baji, Sarikei enggau Sungai Rassau, Batang Igan, Matu kena pentin Atur Nagang Pemindah Diteritka Agi (PKPD) berengkah sehari tu nyentuk 16 April 2021.

Sekretariat Komiti Mutarka Penusah Ngenyit Nengeri sarawak (JPBN) nengah penerang berita madahka pekara nya diputuska komiti berindik ari penambah kes enggau ngenyit ba dua kandang endur nya.

“Pengudah mansik risiko begulai enggau mayuh bengkah ejensi bekaul lokaliti ti nyadi enggau penambah kes enggau ngenyit dalam timpuh lima hari, nya alai JPBNS besetuju bejalaika PKPD ba Kampung Baji, Sarikei enggau Sungai Rassau, Batang Igan, Matu.

“Atur (PKPD) tu berengkah diteritka kena 3 April ngagai 16 April 2021,” ku JPBNS, kemari.

Kelimpah ari nya, bekaul enggau status pelilih menua ba nengeri tu, JPBNS madahka Pelilih Menua Lubok Antu betukar nyadi status Kuning, Pelilih Menua Sri Aman ba status Oren, Pelilih

Menua Betong betukar nyadi status Mirah.

“Sehari tu, Pelilih Menua Lubok Antu udah betukar ke status Kuning ari status Gadung pengudah ngerikotka siti kes berampit ba pelilih menua tu dalam timpuh 14 hari ke udah.

“Pelilih Menua Sri Aman udah betukar status ngagai status Oren ari status Mirah pengudah ngerikodka semina 38 kes berampit ba pelilih menua tu sehari tu (kemari).

“Pelilih menua Betong mega udah betukar status ari status Mirah ngagai Kuning pengudah semina ngerikodka 15 kes berampit ba pelilih menua tu sehari tu. Tu nyadika penyampau semua pelilih menua dalam status Mirah nurun ngagai 10 pelilih menua,” ku JPBNS.

Nambahka nya, Pelilih Menua Dalat, Belaga enggau Lundu mega udah pulai baru ngagai status Gadung ari status Kuning pengudah nadai kes berampit ba pelilih menua dirikotka dalam timpuh 14 hari.

Tu nyadika penyampau semua pelilij menua ba status Gadung nambah ngagai semilan pelilih menua, ku JPBNS.