217 kes baru, dua pemati ketegal COVID-19 di Sarawak
KUCHING: Bisi 217 kes baru COVID-19 enggau dua agi kes pemati ketegal rampit COVID-19, kemari.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka nya nyadika penyampau semua kes positif COVId-19 ba nengeri tu nambah nyadi 16,845 kes.
“Sehari tu (Kemari) bisi 217 kes baru COVID-19 ditemu ba Sarawak. Pelilih Menua ti ngeripotka kes baru iya nya Bintulu (74), Sibu (46), Miri (30), Kuching (28), Julau (10), Meradong (5), Samarahan (5), Mukah (3), Saratok (3), Serian (2), Beluru (2), Kanowit (2), Marudi (2), Matu (2), Betong (1), Sarikei (1) enggau Lubok Antu (1).
“Ari semua 217 kes baru nya, bisi 110 kes asil meresa individu ke bisi kontak nagagai kes positif COVID-19 (enam iku bisi tanda); 65 kes bukai beperesa ba fasiliti pengerai (11 iku bisi tanda); 29 kes asil meresa individu dalam kluster aktif ke udah bisi; lapan (8) kes asil meresa individu bisi tanda ba fasiliti pengerai, tiga (3) kes asil meresa individu pulai ari luar menua (Import A) (India, Singapura enggau Holland) enggau dua (2) kes bekaul enggau individu ti pulai ari nengeri bukai dalam Malaysia ti dikategori nyadi kes Import B,” ku JPBNS, kemari.
Bekaul enggau dua (2) kes pemati baru ketegal rampit COVID-19, nya ngujungka kemari kes pemati nambah nyadi 112 iku.
Kes pemati ke-111 iya nya kes ke-16,701 bekaul enggau siku lelaki peranak menua (Sarawak) beumur 51 taun ti udah diabi ngagai unit kecemasan Sepital Bintulu laban sendat seput.
Pemutus ujian beperesa rT-PCR COVID-19 ditemu positif kena 1 April 2021.
“Tikas pengerai kes (ke111) majak enda manah sereta ditetapka udah nadai kena 1 April 2021. Kes bisi ko-morbid penyakit tungkul sengayuh ba renggat kepenudi, kemi manis, darah tinggi enggau penyakit tungkul ati.
“Lalu kes pemati ke-112 iya nya kes ke-11,466 bekaul enggau siku indu peranak menua (Sarawak) beumur 79 taun ti udah dipasukka ngagai palan kurantin enggau ujian meresa kontak semak ngena rT-PCR ditemu positif kena 8 Mac 2021.
“Kes udah diperubatka ba Sepital Sibu. Tikas pengerai kes majak enda manah sereta ditetapka udah nadai kena 2 April 2021. Kes bisi komorbid penyakit darah tinggi enggau dislipidemia,” ku JPBNS seraya meri penyinu ati ngagai orang ke sebilik enggau kes.
Nambahka nya kemari bisi 193 kes baru gerai sereta dikemendarka pansut ari Sepital Miri (61), Sepital Bintulu (44), Sepital Sibu (34), Sepital Sarikei (17), Sepital Besai Sarawak (17), PKRC Sepital Kapit (13), PKRC Betong (3), PKRC Mukah (2), PKRC Serian (1) enggau Sepital Limbang (1).
Tu nyadika penyampau semua kes positif COVID-19 ke udah gerai sereta dikemendarka pansut ari sepital nambah nyadi 14,019 iku tauka 83.22 peratus ari penyampau semua kes COVID19 ba Sarawak, ku JPBNS.
Kemari mega bisi 256 PUI baru diripotka enggau tiga (3) PUI agi nganti pemutus ujian makmal.