Lee muji sekula ti milih Sistem Begintir Ba Penatai nembiak
MIRI: Beberapa buah sekula di bagi menua Miri milih Sistem Begintir Ba Penatai nembiak kena nagang pengelekai COVID-19, ba hari keterubah muka sesi sekula kemari.
Menteri ke Megai Tanggungpengawa Komiti Mutarka Penusag Ngenyit Bagi Menua (JPBB) Miri, Datuk Lee Kim Shin temegah ati enggau inisiatif ke diambi sekula kena nyaga pengelikun nembiak.
“Semina pelilih Miri ngepunka sesi besekulah 2021 berengkah sehari tu (kemari) berindik ari penambah kes COVID-19 dalam komuniti ti ngujungka Miri nyadi Zon Mirah,” ku iya madah ngagai Utusan Borneo kemari.
Ku iya, sistem begintir nembiak tu ulih ngurangka penyampau nembiak be sesiti maya nyengkaum ngurangka risiko dirampit COVID-19.
“JPBB Miri enggau Opis Pelajar udah mantaika tiga model kena muka baru sekula lalu sekeda ari sekula milih model begintir ba penatai nembiak,” ku iya.
Ku iya baru, model tauka sistem begintir nembiak Primari Satusemina nengah sesi belajar betemu mua dua kali seminggu lalu Primari Dua semina tiga kali seminggu.
Ke bukai nya deka ngena sesi ngajar enggau belajar di rumah nitihka penengkeman enggau norma baru sebedau tu.
“Maya kitai agi beperang ngelaban rampit COVID-19 sereta ngaga pemutus muka sekula tauka enda, inisiatif bukai mesti dipejalai nitihka Prosedur Operasyen Standard (SOP) ngambika bala nembiak nurun besekula baru enggau selamat,” ku iya.
Sekula ti milih sistem begintir di Miri iya nya SJKC Chung Hua Miri, SJKC Chung Hua Krokop, SJKC Chung Hua Pujut, SJKC Chung Hua Lutong, SJKC Chung Hua Chung San dan SJKC Chung Hua Tudan.
Semina SMK Chung Hua Miri sekula sekondari milih sistem nya ditu.
Lee mega madah, pemesai ari Opis Pelajar deka majak berati sereta meresa tetiap sekula di pelilih tu kena nentuka tetiap sekula amat nitihka SOP.