Lebih 1200 menara telekomunikasyen deka didiri kena nambahka peneras Internet
MIRI: Pegawa nirika 1,200 menara telekomunikasyen endang dipejalaika perintah kena nambahka peneras internet entara menua pesisir enggau mengeri nyerumba taun 2022.
Kepala Menteri Datuk Patinggi Abang Johari Tun Openg madah, menara nya deka disikap ngena kereban ti ngenauka bisi sambung entara siti titik enggau titik ke bukai.
“Sarawak nirika 600 menara telekomunikasyen lalu Suruhanjaya Komunikasi enggau Multimedia Malaysia (SKMM) deka nirika 686 menara ari baruhh inisiatif Jalinan Digital Negara (JENDELA),” ku iya ba Pengerami Ngelancharka ‘Jalur Lebar Berkelajuan Tinggi’ di Mulu ditu, kemari.
Ku Abang Johari, reti nya Sarawak ngempu lebih 1,200 menara telekomunikasyen nyengkaum ti udah didirika mungkur kandang endur ke strategik di Sarawak.
“Lebuh kitai bejaku pasal penyambung tu, ke pemadu beguna iya nya ‘signal’ telekomunikasyen ti balat sereta nadai sebarang utai ngachau.
“Landskap Mulu mayuh bukit ngasuh signal nya bisi tekachau, nya kebuah kami deka nirika menara ti mesti ba palan signal ke manah,” ku iya.
Tambah Abang Johari, rampa menua enggau pemesai nengeri Sarawak, bela nyadi pemar ngagai perintah nirika menara telekomunikasyen di menua pesisir.
“Perintah nengeri nengah Sarawak Digital Ekonomy Corporation (SDEC) deka nampung pengawa ngurangka seraka internet di menua pesisir,” ku iya.
Ambi ke chunto ku Abang Johari, temuai ti bemalam di Mulu Marriot Resort deka nanyaka ‘password’ Internet.
“Nya budaya diatu, enti nuan bemalam ba hotel, kita enda nanya pasal bilik tang kita deka nanyaka password Internet.
“Nya kebuah ba palan ke ditapat temuai, kami deka ngemanahka bungkur Internet laban nya tau ngangkatka sektor ekonomi nyadi tegap agi,” ku iya.
Abang Johari mega madaka deka nambahka peneras Internet ba semua begunan Mulu Marriot Resort ngambika bisi dikena temuai ti ngelawa palan nya.
“Kami mega setuju ngangkatmanah perengkaguna Internet di semua penyuru hotel tu ngambika semua orang ulih ngena perengkaguna nya,” ku iya.
Ku Abang Johari, nengah pemisi Internet ke deras di Mulu, pengawa ngelakuka sektor ekonomi enggau dagang temuai ulih dipejalaika lebih agresif.
Sama bisi maya nya, Menteri Dagang Temuai, Senia Enggau Main Asal Sarawak, Datuk Abdul Karim Rahman Hamzah, Menteri Muda Perabu Mengeri, Pengatur Tanah enggau Rampa Menua, Datu Len Talif Salleh, Menteri Muda Pekara Korporat Enggau UKAS Abdullah Saidol, ADUN Mulu Dato Gerawat Gala enggau Managing Direktor SACOFA Zaid Zaini.