Mussen, Simoi udah betuchuk vaksin dos kedua Covid-19

SRI AMAN: Menteri Muda Pemansang Industri ke mega Kaban Kunsil Nengeri Batang Ai, Datuk Malcom Mussen Lamoh enggau Kaban Kunsil Nengeri Lingga, Simoi Peri sama bisi datai betuchuk dos kedua vaksin Covid-19 ba palan nuchuk Vaksin nya, di Dewan Suarah Sri Aman kemari.

Malcom enggau Simoi antara 234 iku ti datai betuchuk Vaksin Pfizer-BioNTech di Sri Aman.

Ngena peluang nya, Simoi ngelalau rayat Sarawak kelebih agi ba Sitak Kunsil Nengeri (DUN) Lingga, ngambika anang mendingka sebarang berita selebubu ti madahka vaksin nya enda manah.

Ku Simoi, tuju nuchuk vaksin tu endang kena nyaga diri enggau mensia mayuh ke ngelingi kitai ngambika ulih ngurangka dirampit Covid19.

“Aku meri besai terima kasih ngagai perintah nengah Opis Menteri Pengerai laban nuchuk vaksin ti enda bebayar tu ngagai 80% ari penyampau tubuh peranak menua tu ke bisi 6.5 juta iku,”ku iya.