PKPD di Kpg Serpan Laut sereta Jil, Kuarters Staf Sri Aman berengkah 8 April

KUCHING: Atur Nagang Pemindah Diteritka Agi (PKPD) dipejalaika ba Kampung Serpan Laut, Asajaya sereta Jil Sri Aman enggau Kuarters Staf, Sri Aman berengkah dipejalaika sehari tu (8 April) dalam timpuh 14 hari.

Seketerait Komiti Mutarka Penusah Ngenyit Nengeri Sarawak (JPBNS) madahka pekara nya diputuska pengudah mansik risiko begulai enggau mayuh bengkah ejensi ba lokaliti ti bisi nambah kes enggau ngenyit.

“Berindik ari pekara nya Komiti Mutarka Penusah Ngenyit Nengeri Sarawak besetuju bejalaika PKPD ba Kampung Serpan Laut, Asajaya sereta ba Jil Sri Aman enggau Kuarters Staf, Sri Aman berengkah 8 April 2021 ngagai 21 April 2021,” ku JPBNS nengah penerang berita, kemari.

Nambahka nya JPBNS madahka PKPD ba Kampung Batu Gong, Serian dilanjarka ngagai 23 April 2021.

Pekara nya diputuska pengudah Opis Menteri Pengerai Malaysia netapka agi nyadi pengelekai kena rampit sereta bisi kes baru ditemu ba raban bansa di kandang endur nya.

“PKPD ba Kampung batu Gong, Serian dilanjarka berengkah 10 April ngagai 23 April 2021.

“Kelimpah ari nya, PKPD ba Kampung Chupak, Siburan, Serian diketuka nitih ti udah ditimpuhka kena 9 April 2021,” ku JPBNS.