332 kes baru, dua kes pemati ketegal COVID-19 dirikodka di Sarawak

KUCHING: Bisi 332 kes baru COVID-19 enggau dua agi kes pemati ketegal rampit COVID-19 ba Sarawak, kemari.

Sekretariat Komiti Mutarka Penusah Ngenyit Nengeri Sarawak (JPBNS) madahka nya ngujungka penyampau semua kes positif COVID-19 ba nengeri tu nambah nyadi 18,496 kes.

Ari penyampau semua 332 kes baru diripotka nya bisi 47 iku udah ngayan tanda enggau betapi tanda rampit COVID19 maya diperesa, lalu ke bukai iya nya 279 iku kes iya nya nyengkaum individu ti diasuh kuarantin ba palana kuarantin ti bisi disediaka.

“Pelilih Menua ke ngeripotka kes baru iya nya Meradong (121), Bintulu (48), Miri (43), Sibu (36), Kuching (24), Samarahan (13), Julau (6), Asajaya (4), Beluru (4), Daro (4), Sarikei (4), Serian (4), Sri Aman (4), Betong (3), Kapit (3), Mukah (3), Sebauh (2), Subis (2), Belaga (1), Dalat (1), Limbang (1) enggau Tebedu (1).

“Ari penyampau semua 332 kes baru diripotka bisi 161 kes asil ari meresa individu dalam kluster aktif ke udah bisi ; 114 kes asil meresa individu ti bisi kontak ngagai kes positif COVId-19 (19 iku bisi tanda); 27 kes beperesa bukai ba fasiliti pengerai (dua iku bisi tanda); 26 kes asil meresa individu bisi tanda ba fasiliti pengerai; tiga kes bekaul individu pulai ari nengeri bukai dalam Malaysia (kes Import B) enggau siti kes bekaul enggau individu pulai ari Taiwan (Kes Import A).

“Sehari tu mega bisi dua agi kes pemati ketegal rampit COVID-19, tu nyadika penyampau semua nambah nyadi 116 iku,” ku JPBNS nengah penerang berita, kemari.

Bekaul enggau kes pemati baru, kes pemati ke-115 iya nya kes ke-16,172 bekaul enggau siku penarank menua (Sarawak) beumur 61 taun ti udah dipasukka ba Sepital Sibu laban pedis dada.

Iya diperesa ngena ujian rT-PCR kena 29 Mac 2021 laban ti betapi enggau penanggul pedis enseput enggau ditetapka positif COVID-19 kena 29 Mac 2021.

“Tikas pengerai kes (ke115 ) majak enda manah sereta ditetapka udah nadai kena 5 April 2021. Kes bisi ko-morbid penyadit darah tinggi, penyakit kemi manais, penyakit jantung enggau penyakit buah pinggang kronik.

“Kes pemati kedua, kes ke-116 iya nya kes ke-17,373 bekaul enggau siku indu peranak menua (Sarawak) beumur 86 taun udah dipasukka ba Sepital Sibu laban bisi tabin.

“Kes diperesa ngena ujian rT-PCR sereta ditetapka positif kena 3 April 2021. Tikas pengerai kes ditemu majak enda manah sereta ditetapka udah nadai kena 6 April 2021,” ku JPBNS.

Kes ke-116 nya bisi komorbid penyakit paru-paru kronik (COPD), penyakit darah tinggi, penyakit kemi manis, enggau tungkul sengayuh ti enda manah.

JPBNS meri penyinu atai ngagai orang ke sebilik enggau dua kes pemati nya.

Kelimpah ari nya JPBNS ngeripotka bisi 158 kes baru udah gerai sereta dikemendarka pansut ari Sepital Miri (35), Sepital Besai Sarawak (34),Sepital Sibu (19), Sepital Sarikei (17), PKRC Sepital Kapit (17), Sepital Bintulu (12), PKRC Serian (6), PKRC Sepital Sri Aman (6), PKRC Sepital Mukah (5), Sepital Limbang (4) enggau PKRC Betong (3).

Tu nyadika penyampau semua kes COVID-19 udah gerai sereta dikemendarka pansut ari Sepital naka kemari bisi 15,087 iku tauka 81.57 peratus ari penyampau semua kes COVID-19 ba Sarawak, ku JPBNS.

Kemari mega bisi 406 PUI baru udah diripotka enggau bisi 11 PUI agi nganti pemutus peresa makmal.