PKPB di Sarawak dilanjar ari 13 nyentuk 26 April

KUCHING: Atur Mindah Betagang Bisi Penetap (PKPB) di Sarawak dilanjar nyentuk 26 April 2021, berindik ari kes positif COVID19 ba nengeri tu agi tinggi.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, pekara nya diputuska komiti dalam aum pengudah pansik dipejalaika.

"Pengudah meda enggau mansik gaya kes positif di Sarawak agi tinggi, JPBNS udah ngaga pemutus ngelanjarka PKPB di Sarawak, berengkah 13 April 2021 pukul 12.01 pagi ngagai 26 April 2021 pukul 11.59 malam.

"(Baka) sehari tu, bisi 211 kes baru COVID-19 ditemu di Sarawak lalu nya ngujungka penyampau semua kes positif COVID-19 nambah nyadi 18,707 kes.

"Ari penyampau 211 kes baru nya nyengkaum diripotka ba Pelilih Menua Bintulu (70), Sibu (35), Sarikei (21), Miri (19), Kuching (15), Sri Aman (8), Beluru (7), Kapit (6), Meradong (6), Limbang (6), Samarahan (5), Subis (3), Bau (2), Marudi (2), Lubok Antu (1), Julau (1), Serian (1), Mukah (1), Dalat (1), enggau Tanjung Manis (1)," ku JPBNS, kemari.

Nitihku penerang JPBNS, ari penyampau 211 kes baru nya nyengkaum 131kes asil ari meresa individu ke bisi kontak semak ngagai kes positif COVID-19 (38 iku bisi tanda); 45 kes asil meresa individu dalam kluster aktif ke udah bisi; 17 kes asil meresa individu bisi tanda ba fasiliti pengerai; 16 kes bukai beperesa ba fasiliti pengerai (siku bisi tanda); siti kes bekaul enggau individu pulai ari luar menua iya nya ari United Arab Emirates (Kes Import A) enggau siti kes bekaul enggau individu pulai ari nengeri bukai dalam Malaysia (kes Import B).

Nambahka nya, JPBNS kemari mega bisi ngeripotka siti kes pemati baru ketegal rampit COVID-19 ti ngujungka penyampau semua kes pemati nambah nyadi 117 iku.

"Kes pemati ke-117 iya nya kes ke-15,960 bekaul enggau siku indu peranak (Sarawak) beumur 83 taun ti dipasukka ba Sepital Miri laban bisi tanda tabin enggau tusah enseput.

"Beperesa rT-PCR sereta ditemu positif COVID-19 kena 28 Mac 2021. Tikas pengerai kes majak enda manah sereta kes ditukuka nadai kena 7 April 2021," ku JPBNS seraya meri penyinu ati ngagai sida ke sebilik enggau kes.

Kes ke-117 mega bisi ko-morbid penyakit darah tinggi, kemi manis enggau dislipidemia,ku JPBNS.

Kelimpah ari nya JPBNS ngeripotka kemari bisi 181 kes baru gerai enggau dikemendarka pansut ari Sepital Sibu (49), Sepital Miri (34), Sepital Besai Sarawak (31), Sepital Bintulu (27), PKRC Serian (19), Sepital Sarikei (8), PKRC Sepital Kapit (5),PKRC Sepital Sri Aman (5), PKRC Sepital Mukah (2) enggau PKRC Betong (1).

Tu nyadika penyampau semua kes udah gerai sereta dikemendarka pansut ari sepital nambah nyadi 15,268 iku tauka 81.62 peratus ari penyampau semua kes COVID-19 di Sarawak.

Lalu kemari mega bisi 252 PUI baru diripotka enggau lapan PUI agi nganti pemutus peresa makmal.