40 iku dikompaun ketegal bisi dalam kafe ti beoperasyen ngelui jam ditetapka
SIBU: Empat puluh iku udah dikompaun entara RM10,000 enggau RM1,500 pengudah ditemu bisi dalam sebuah kafe, ba Jalai Adam ditu, ketegal ngelui timpuh dikemendarka dibuka maya Atur Nagang Pemindah Bisi Penetap (PKPB) malam ensana.
Kepala Polis Pelilih Sibu, ACP Stanley Jonathan Ringgit madahka individu ti dikompaun iya nya siku pengempu kafe dikompaun RM10,000 sereta lapan iku pekereja enggau 31 iku orang datai makai enggau ngirup kia ti dikompaun RM1,500.
Ku iya, kena pukul 10.45 malam ensana, seraban polis enggau raban penerit adat Opis Kausil Mengeri Sibu (MPS) udah datai meresa kafe nya.
“Lebuh ke meresa nya, semua suspek ditemu udah ngaga penyalah laban pengempu premis enggau orang ke datai kia nya, dalam premis ti beroperasyen ngelui jam ti ditetapka,” ku iya.
Ku iya nitihka pansik tumu, kafe bejalaika dagang nyual pemakai babekiu enggau nyual ai irup bealkohol sereta dedat laban orang ti datai makai enggau ngirup kia. — Bernama