COVID-19: 960 kes positif baru dirikodka di Sarawak
KUCHING: Sarawak kemari ngerikodka penyampau kes tiap hari pemadu tinggi iya nya 960 kes lalu ari penyampau nya pemadu mayuh diripotka ba Pelilih Menua Kuching bisi 370 kes.
Sapit Kepala Menteri Datuk Amar Douglas Uggah Embas madahka, nangkan ka Pelilih Menua Kuching, kes baru nya diripotka ba Pelilih Menua Bintulu (175), Mukah (103), Sibu (100), Miri (83), Kapit (24), Belaga (20), Bukit Mabong (13), Serian (9), Selangau (7), Kanowit (6), Sebauh (5), Subis (5), Tatau (5), Marudi (5), Kabong (4), Sri Aman (4), Song (3), Lubok Antu (3), Betong (3), Samarahan (3), Matu (3), Daro (2), Bau (2), Beluru (1), Sarikei (1) enggau Tanjung Manis (1).
Tu ngujungka penyampau semua kes positif COVID-19 ba Sarawak naka kemari nambah nyadi 22,920 kes.
“Sehari tu (Kemari) bisi 960 kes baru COVID-19 ditemu ba Sarawak. Ari penyampau nya, 896 kes tauka 93 peratus udah dalam kuarantin.
“Pelilih Menua Kuching ngeripotka 370 kes lalu ari penyampau nya bisi 313 kes (33 peratus) ari Palan Latih Polis ba Jalai Puncak Borneo lalu tu kandang endur ti agi ulih dijaga.
“Lalu ba Pelilih Menua Mukah ti ngeripotka 103 kes lalu ari penyampau nya 99 kes (10 peratus) ari Politeknik Mukah (Kluster Jalan Bambangan, Mukah),” ku iya, kemari.
Uggah mansutka pekara nya ba aum pengarang berita COVID-19Sarawaktidiaturba Begunan Lama DUN ditu.
Ku iya, ari 960 kes baru diripotka kemari nya bisi 60 iku ngayanka tanda enggau bisi tanda rampit COVID-19 maya diperesa.
Lalu ari penyampau 960 kes baru nya mega nyangkaum 452 kes asil ari meresa individu bisi kontak ngagai kes positif COVID-19 (20 iku bisi tanda); 440 kes asil meresa individu dalam kluster aktif ke udah bisi (siku bisi tanda); 39 kes asil meresa individu bisi tanda ba fasiliti pengerai; 25 kes kes bukai beperesa ba fasiliti pengerai; tiga kes bekaul enggau individu pulai ari luar menua (Import A) iya nya ari menua Indonesia enggau siti kes bekaul enggau individu pulai ari nengeri bukai dalam Malaysia Import B.
Kemari mega diripotka bisi 381 kes baru udah gerai enggau dikemendarka pansut ari PKRC Sepital Bintulu (110), PKRC Sepital Sibu (96), PKRC Mukah (49), Sepital Besai Sarawak (32), Hospital Sarikei (32), PKRC Sepital Miri (30), PKRC Kapit (8), PKRC Serian (8), Sepital Sri Aman (7), PKRC Betong (6),Sepital Limbang (2) enggau PKRC Lawas (1).
Tu nyadika penyampau semua kes positif COVID-19 udah gerai sereta dikemendarka pansut ari sepital nambah nyadi 17,667 iku tauka 77.08 peratus ari penyampau semua kes COVID-19 ba Sarawak.
Lalu kemari bisi 960 PUI baru diripotka enggau nadai PUI nganti pemutus ujian makmal.
Kelimpah ari nya Uggah kemari madah bisi tiga kluster udah tembu.
“Sehari tu, Opis Pengerai Nengeri Sarawak udah ngenukuka tiga kluster ti udah abis pengudah nadai kes baru diripotka dalam timpuh 28 hari ke udah iya nya Kluster Melor, Pusa, Kluster Jalan Main Bazaar, Sri Aman enggau Kluster Kiba, Sibu,” ku iya seraya madah naka kemari semina 46 kluster agi aktif.
Kemari mega, Pelilih Menua Bau, Belaga enggau Selangau udah betukar status ari Kuning ngagai Oren pengudah ngerikodka lebih ari 20 kes berapit ba pelilih menua tu dalam timpuh 14 hari ke udah.
Sama bisi ba aum pengarang berita nya Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.