JPBNS neritka atur mindah entara zon berengkah 19 April 2021
KUCHING: Komiti Mutarka Penusah Ngenyit Nengeri Sarawak (JPBNS) deka neritka agi pemindah entara zon iya nya patut minta pemendar ari Polis Diraja Malaysia (PDRM) berengkah 19 April 2021.
Sapit Kepala Menteri, Datuk Amar Douglas Uggah Embas madahka nya berindik ari pemayuh kes positif ti dirikodka kenyau ari bulan Januari 2021 nyentuk diatu ketegal pemindah entara zon.
“JPBNS udah nemu sepenyampau 505 kes positif enggau lapan (8) kluster ti dirikotka kenyau bulan Januari 2021 nyentuk diatu ketegal pemindah entara zon (pergerakan antara zon) (Import C).
“Nya alai, JPBNS ngaga pemutus neritka agi pemindah entara zon.
“Berengkah 19 April 2021 (Hari Isnin), pemindah entara zon patut bisi pemendar ari PDRM,” ku iya, kemari.
Uggah ti mega Chairman JPBNS mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu.
Iya madahka PDRM udah dipinta semina ngeluarka permit polis ngagai sida ti bisi lis dalam kategori servis pemadu beguna (essential service) ti dikemendarka aja.
“Lis servis pemadu beguna iya nya perengka pengangkut mensia mayuh, deriba ti ngajung barang pemakai enggau ke diguna tiap hari sereta maya bisi penusah ngenyit,” ku iya.
Kelimpah ari nya, JPBNS kemari mega ngemutuska pekara bekaul enggau timpuh operasyen dagang.
“Semina premis dagang ti bejalaika dagang renchit enggau barang pemakai aja dikemendarka beoperasyen nyentuk pukul 12:00 malam.
“Lalu palan pemerindang ti beoperasyen baka bistro enggau kafe (nyengkaum palan karaoke) semina dikemendarka beoperasyen nyentuk pukul 10 malam aja,” ku Uggah.