PKPD dipejalaika di PULAPOL, Jalai Puncak Borneo berengkah 16 April
KUCHING: Atur Nagang Pemindah Diteritka Agi (PKPD) dipejalaika ba Palan Latih Polis (PULAPOL), Jalai Puncak Borneo berengkah kemari (16 April) nyentuk 29 April 2021, berindik ari kemari bisi nambah 295 iku agi pelatih ba palan nya dituku positif COVID-19.
Pesuruhjaya Polis Sarawak Datuk Aidi Ismail madahka, enti ditambah enggau penyampau kes baru (295) nya ngujungka semua bisi 415 iku pelatih ditukuka positif COVID-19 pengudah diperesa.
Iya madahka, kelimpah ari 415 iku pelatih, sama ditemu positif virus tu iya nya 20 iku tenaga pengajar enggau diri sebilik.
Berindik ari pekara nya pentin PKPD dipejalaika ba PULAPOL dikena nyeliahka ari ngerampit raban bansa.
“Berindik ari pekara nya, Atur Nagang Pemindah Diteritka Agi (PKPD) dipejalaika ba palan tu berengkah sehari tu (16 April 2021) nyentuk 29 April 2021.
“Aku ngarapka PKPD, kitai ulih nagang pengelekai sereta nurunka penyampau (kes).
“Kitai deka munaska igi penyaki tu enggau lengkas,” ku iya.
Iya mansutka pekara nya pengudah nyempulang Sapit Kepala Menteri ti mega Chairman Komiti Mutarka Penusah Ngenyit Nengeri Sarawak Datuk Amar Douglas Uggah ngabas Bilik Operasyen PKPD nya kemari.
Kena 13 April 2021, bisi 61 iku pelatih ditemu positif COVID-19.
Kes indeks iya nya siku pelatih ti peresa ‘swab’ ba Klinik Pengerai Kota Sentosa kena 9 April 2021 sereta ditemu positif kena 12 April 2021.
KesasalarimenuaPerlisdatai ke Sarawak kena 22 November 2020 laban belatih ba palan tu.
Nitihku iya, semua ti dirampit COVID-19 nya diperubatka ba palan tu empu, sereta Opis Pengerai nirika klinik pengerai 24 jam enggau Covid Assessement Centre (CAC) ba palan tu.
Operasyen nyidi kes ngena chara aktif (ACD) bisi dipejalaika ba palan tu berengkah 12 ngagai 14 April 2021 ti mungkur 633 iku diperesa.
“ACD kedua dipejalaika berengkah 17 ngagai 19 April tu dipelabaka deka mungkur urung 2,000 iku.
Sama bisi datai Menteri Kaunsil Kandang Menua enggau Pengawa Berumah Dato Sr Dr Sim Kui Hian, Komandan Kem SAC Razali Mohamad enggau Sapit Direktor Opis Pengerai Nengeri Dr Rosemawati Ariffin sereta sida ke bukai.