DUN Tamin nerima RM46.7 juta bejalaika Projek Rayat
SELANGAU: Sitak Kunsil Nengeri (DUN) Tamin udah nerima agih belanja sepenyampau RM46.7 juta ari perintah Sarawak ari baruh Projek Rayat.
Kaban Kunsil Nengeru (ADUN) Tamin Christopher Gira Sambang madahka semua projek nya benung dipejalai lalu dipelabaka tembu dalam tengan taun tu.
“Aku ngarika peranak DUN Tamin meri besai terima kasih ngagai Kepala Menteri Datuk Patinggi Abang Johari Tun Openg enggau perintah Sarawak ketegal penyiru sida ngagai rayatdi nengeri tu kelebih agi di sitak Tamin,” ku iya.
Dulu ari nya, Gira udah matau projek rayat di sitak Hulu Pakoh enggau Batang Oya kemari.
“Muakka pagi, aku bisi ngelimpangka awak matau pengawa ngaga projek bekal elekterik menua pesisir renggat kedua ba sitak Sekuau ungkup tujuh rumah panjai di Pakoh enggau Bunau.
“Aku udah diberi penerang iya nya pengawa masang 364 tiang nyengkaum kabel tembu semua nya. Lalu, 100 tiang agi benung dipasang, peranak rumah panjai deka ngasaika perengkaguna elekterik 24 jam kena bulan Jun ti deka datai,” ku iya.
Muakka lemai, Gira bisi datai bejadika bekal elekterik Rumah Akoh semanjai 32 pintu di Jalai Tajam Batang Oya.
“Sebedau tu, rumah panjai nya ngena injin api ti nyadika pun pemisi kuasa karan. Aku dipadahka TR Akoh sebedau tu sida udah melanjaka RM300 nyentuk RM400 sebulan ungkup injin api.
“Enggau pemisi bekal elekterik 24 jam diatu, sida sebilik mayar bil elekterik urung RM80 sebulan,” ku iya.
Sama bisi datai iya nya Pemesai Pelilih Menua Selangau Inting Nyami, Penghulu Andrewson Ngalai sereta ke bukai.