Orang ke bedagang nyukung pemutus ngelanjarka PKPB taja pan balat napi pengerugi
KUCHING: Pengempu restoran di mengeri besai tu nurutka pemutus ngelanjarka Atur Nagang Pemindah Bisi Penetap (PKPB) nyentuk 7 Jun tu, taja pan asil ari pengawa sida ke bejual bisi kurang laban nadai mayuh orang datai.
Pengempu Kafe Kuehpedia, Affila Othman madah, sida nemu nama kebuah timpuh PKPB di Sarawak mesti dilanjarka, iya nya kena nagang pengelekai COVID-19 ti majak ngasuh ati irau.
“Taja pai nyadi orang ke bedagang, nya meri empas ngagai asil bejual laban semina servis nganjung pemakai enggau ditungkus bai pulai aja dikemendarka sekumbang timpuh tu,” ku iya madah ngagai Utusan Borneokemari.
Iya ngaku nengah atur enda ngemendarka premis nyual pemakai beoperasyen enggau chara “dine-in” tauka makai ba kedai, udah ngujungka asil ke diulih sida bejual nurun ngagai 60 nyentuk 80 peratus.
“Kebuah pia, tebal agi orang ke suah datai makai kitu deka agi makai dalam kedai enti dibandingka enggau ditungkus tauka mai pemakai nya pulai,” ku iya.
Ba Menijar Kedai Kafe Bujang Lelang, Ayza Josim, taja pan nurutka pemutus nya, iya ngarapka PKPB enda dilanjarka ngagai timpuh ke panjai agi laban nya ngeruga penatai pemisi dagang kedai.
“Enti kedai enda dibuka ngagai mensia mayuh, dagang enda bejalai enggau manah laban tebal agi orang ke datai makai nya milih “dine-in”.
“Tu ngeruga asil ke diulih bejual nyengkaum ai irup, laban nyual ai irup pan bisi meri penatai pemis. Orang dagang ke nyuwa palan mit mega engka nutup dagang sida laban mar bulih penatai pemisi, lalu tu mega meri empas ngagai orang ke ngempu kedai,” ku iya.
Enti perintah ngelanjarka
PKPB ku Ayza, sida mega patut ngelanjarka bantu Geran Khas Prihatin tau kadiskaun 50 peratus ngagai orang ke nyuwa kedai nyengkaum orang dagang bukai ngambika sida majak ulih bedagang.
Berebak enggau nya, pengempu Mee Brunei Muzium di Satok, Siti Shalawati Molok madaha, iya setuju PKPB dilanjarka ke pengelikun rayat laban beratika kes COVID-19 di Sarawak mengkang tinggi.
“Tetapi ba orang dagang mit baka kami, situasyen tu endang amat mar laban ukai semina nanggung pengerugi laban asil ke ulih kami bejual enda mayuh. Kami mega mesti mayar gaji pekereja, suwa kedai enggau ungkus operasyen bukai.
“Nya alai manah agi perintah meri bantu ti tau nulung ngelempungka tating kami tauka chara bukai ti ulih mantu ngangkatka dagang maya ke tapi enggau COVID-19 tu,” ku iya.
Pengempu Qims Café, Nur Mustaqim Biswandy mega nyukung PKPB dilanjarka kena ngurangka kes COVID-19 tang enda entu setuju enggau prosedur oprasyen standard (SOP) ti suah betukar sereta enda engkeman enggau gaya ke diatu.
Ku iya, SOP ti nagang makai ba kedai tang ba palan bebeli barang di peda enda nyaga seraka fizikal tau beroperasyen baka selama.
Nma kebuah kompeni dagang ke besai enda dijaga enggau terit tang industri jelan pemesai baka kami jaga terit ngena SOP? Nya alai ba penemu aku, manah agi atur nagang pemindah dipejalaika mungkur semua pengelama 21 hari baka ti dipejalaika di New Zealand enggau menua bukai kena nagang penyakit tu, ari ti suah betukar SOP tiap hari tang lalu enda tetagangka nya,” ku iya.
Mustaqim ti udah bedagang pengelama dua taun madahka asil ari bejual ba kedai iya diatu nurun nyentuk ke 70 peratus sereta ngarapka perintah ulih nyendiaka inisiatif ti ulih merangsang ekonomi enggau ke pemaik sektor dagang.
Pengempu Restoran Mom Laksa, Mastika Jamali madah, iya setuju enggau atur ti dipejalaika perintah kena mutarka penanggul COVID-19 ti ngelanjarka timpuh PKPB di Sarawak nyentuk 7 Jun.
“Taja pan restora enda dikemendarka alai “dinein” sekumbang PKPB tu, tang kitai enda tau beratka diri empu aja nyentuk ke enda meri kerejasama ngagai perintah. Nyadi orang dagang, kitai patut nyaup ngelaban penyakit tu,” ku iya.
Kitai patut beterima kasih laban agi dikemendarka bedagang nengah chara nganjung pemakai tauka ditungkus bai pulai, ku iya.
Nyadi orang dagang, kitai patut berunding panjai tauka lebih kreatif maya penyakit COVID-19 ke nyadi diatu lalu ukai nyalahka situasyen ke diatu. Taja pia, mensia begunaka pemakai, nya alai kitai semina nukar strategi dagang kitai.
“Taja pia dagang aku majak manah nengah perambu nyual baka kimpin strategi “FOOD ANDA” enggau “LAKSA INSTANT” ti ngemudahka orang ke deka makai nya enda mindah ari rumah,” ku iya seraya ngarapka PKPB tu ulih mantu ngurangka kes rampit COVID-19.